વડોદરામાં VGRC અંતર્ગત ભવ્ય ટ્રેડ શોનું ઉદ્ઘાટન: 150થી વધુ સ્ટોલે ખેંચ્યું ધ્યાન
વડોદરામાં VGRC અંતર્ગત ભવ્ય ટ્રેડ શોનું ઉદ્ઘાટન: 150થી વધુ સ્ટોલે ખેંચ્યું ધ્યાન
વડોદરા વડોદરામાં આયોજિત ‘વાઇબ્રન્ટ ગુજરાત રિજનલ કોન્ફરન્સ (VGRC)’ અંતર્ગત મુખ્યમંત્રી શ્રી ભૂપેન્દ્રભાઈ પટેલના વરદ્હસ્તે મધ્ય ગુજરાતના ઉદ્યોગો, સ્ટાર્ટઅપ્સ અને સરકારી સાહસોની સિદ્ધિઓને રજૂ કરતા ભવ્ય ટ્રેડ શો અને અત્યાધુનિક પ્રદર્શનનું ઉદ્ઘાટન કરવામાં આવ્યું છે. 150થી વધુ સ્ટોલ સાથે શરૂ થયેલું આ પ્રદર્શન વિકાસ અને નવીનતાનું કેન્દ્ર બન્યું છે, જ્યાં અનેક મહાનુભાવોની ઉપસ્થિતિમાં કાર્યક્રમને ખુલ્લું મૂકવામાં આવ્યું હતું.
વડોદરા ખાતે યોજાયેલા આ પ્રદર્શનના ઉદ્ઘાટન પ્રસંગે કેન્દ્રીય વીજ મંત્રી શ્રી મનોહરલાલ ખટ્ટર, નાયબ મુખ્યમંત્રી શ્રી હર્ષભાઈ સંઘવી, ઊર્જામંત્રી શ્રી ઋષિકેશભાઈ પટેલ, કૃષિમંત્રી શ્રી જીતુભાઈ વાઘાણી, આદિજાતિ રાજ્યમંત્રી શ્રી નરેશભાઈ પટેલ તેમજ મુખ્ય સચિવ શ્રી મનોજકુમાર દાસ સહિત અનેક ઉચ્ચ અધિકારીઓ અને મહાનુભાવો ઉપસ્થિત રહ્યા હતા.
પ્રદર્શન દરમિયાન મધ્ય ગુજરાતના વિવિધ ક્ષેત્રોના ઉદ્યોગો, સ્ટાર્ટઅપ્સ તથા સરકારી સાહસોએ પોતાના નવીન પ્રોજેક્ટ્સ, ટેક્નોલોજી અને સિદ્ધિઓનું પ્રદર્શન કર્યું હતું. 150થી વધુ સ્ટોલ પર રજૂ થયેલા આ પ્રદર્શનને મુલાકાતીઓ તરફથી સારો પ્રતિસાદ મળી રહ્યો છે.
ઉદ્ઘાટન બાદ મુખ્યમંત્રી શ્રી ભૂપેન્દ્રભાઈ પટેલ સહિતના મહાનુભાવોએ વિવિધ સ્ટોલની મુલાકાત લીધી હતી. તેમણે પ્રદર્શનકારો સાથે સીધી વાતચીત કરી તેમની કામગીરીની પ્રશંસા કરી અને તેમને પ્રોત્સાહન આપ્યું હતું.
સરકાર દ્વારા આયોજિત આ VGRC પ્રદર્શન મધ્ય ગુજરાતના ઔદ્યોગિક વિકાસને નવી ગતિ આપનાર અને રોકાણ માટે નવા અવસર ઉભા કરનાર મંચ તરીકે જોવામાં આવી રહ્યું છે.
