Virat Kohliએ રચ્યો ઈતિહાસ, મોહમ્મદ અઝહરુદ્દીનનો 28 વર્ષ જૂનો રેકોર્ડ તોડ્યો

Virat Kohli: વિરાટ કોહલીનું ODI ક્રિકેટમાં વાપસી એક ખાસ રેકોર્ડ સાથે થઈ છે. તિરુવનંતપુરમમાં વેસ્ટ ઈન્ડિઝ સામેની પ્રથમ ODIમાં મેદાન પર ઉતરતાની સાથે જ વિરાટ કોહલીએ ભૂતપૂર્વ ભારતીય કેપ્ટન મોહમ્મદ અઝહરુદ્દીનનો 28 વર્ષ જૂનો રેકોર્ડ તોડ્યો. તે હવે વેસ્ટ ઈન્ડિઝ સામે ભારત માટે સૌથી વધુ ODI મેચ રમનાર ખેલાડી બની ગયો છે. 3 મેચની ODI સિરીઝની પ્રથમ મેચમાં મેદાનમાં ઉતરતા જ વિરાટ કોહલીએ આ સિદ્ધિ મેળવી હતી.

ભારત અને વેસ્ટ ઈન્ડિઝ આજે એટલે કે 27 સપ્ટેમ્બરના રોજ ગ્રીનફિલ્ડ ઈન્ટરનેશનલ સ્ટેડિયમમાં આમને-સામને છે. આ વિરાટ કોહલીનો વેસ્ટ ઈન્ડિઝ સામે 44મી ODI મેચ છે. આ પહેલા ભારત માટે આ ટીમ સામે સૌથી વધુ ODI રમવાનો રેકોર્ડ અઝહરુદ્દીનના નામે હતો, જેને વેસ્ટ ઈન્ડિઝ સામે 43 મેચ રમી હતી.

વેસ્ટ ઈન્ડિઝ સામે ભારત માટે સૌથી વધુ ODI મેચ રમનારા ખેલાડીઓના લિસ્ટમાં, કપિલ દેવ 42 મેચ સાથે ત્રીજા નંબરે છે, રાહુલ દ્રવિડ 40 મેચ સાથે ચોથા સ્થાને છે અને એમએસ ધોની 39 મેચ સાથે પાંચમા સ્થાને છે. સચિન તેંડુલકરે પણ વેસ્ટ ઈન્ડિઝ સામે 39 ODI મેચ રમી છે.

વિરાટ કોહલીની નજર ચંદ્રપોલના રેકોર્ડ પર

તમને જણાવી દઈએ કે ભારત અને વેસ્ટ ઈન્ડિઝ વચ્ચે સૌથી વધુ વનડે મેચ રમવાનો રેકોર્ડ વેસ્ટ ઈન્ડિઝના ભૂતપૂર્વ કેપ્ટન શિવનારાયણ ચંદ્રપોલના નામે છે. તેમને 1994 થી 2009 દરમિયાન ભારત સામે કુલ 46 વનડે રમી હતી. જો વિરાટ કોહલી વર્તમાન સિરીઝની ત્રણેય મેચમાં રમે છે, તો તે ચંદ્રપોલના રેકોર્ડની બરાબરી કરશે. આ દરમિયાન જ્યારે વેસ્ટ ઈન્ડિઝ સામે સૌથી વધુ વનડે રમનારા ખેલાડીઓની વાત આવે છે, ત્યારે પાકિસ્તાનના ભૂતપૂર્વ કેપ્ટન જાવેદ મિયાંદાદ અને વસીમ અકરમ સંયુક્ત રીતે ટોચ પર છે. બંનેએ કેરેબિયન ટીમ સામે 64-64 વનડે રમી છે.

સદી ફટકારતાની સાથે જ વિરાટ ઈતિહાસ રચશે

વિરાટ કોહલી માટે આ મેચ ફક્ત રેકોર્ડ બનાવવા વિશે નથી. તેની પાસે પોતાના બેટથી ઈતિહાસ રચવાની પણ તક છે. વિરાટ કોહલીએ અત્યાર સુધી વેસ્ટ ઈન્ડીઝ સામે 9 ODI સદી ફટકારી છે. જો તે પહેલી મેચમાં સદી ફટકારે છે, તો તે આ ટીમ સામે 10 ODI સદી ફટકારનાર ક્રિકેટ ઈતિહાસનો પ્રથમ ખેલાડી બનશે.

આ સિવાય વિરાટ કોહલી 15 હજાર ODI રન પૂરા કરવાથી માત્ર 59 રન દૂર છે. તેના 314 ODI મેચમાં 14941 રન છે. જો તે પહેલી ODIમાં 59 રન બનાવે છે, તો તે આ ફોર્મેટમાં 15 હજાર રન પૂરા કરનાર વિશ્વનો બીજો બેટ્સમેન બનશે. તેની પહેલા ફક્ત સચિન તેંડુલકરે જ આ સિદ્ધિ મેળવી છે.

આ પણ વાંચો: Asian Games 2026: અનાહત સિંહે રચ્યો ઈતિહાસ, વિમેન્સ સિંગલ્સ સ્ક્વોશમાં સિલ્વર મેડલ જીતનાર પ્રથમ ખેલાડી બની