Dahod : કારને બચાવવા જતાં ટ્રકે ગુમાવ્યો કાબૂ, અકસ્માતમાં ટ્રક ચાલક કેબિનમાં ફસાતા રેસ્કયૂ કરાયું

Dahod : અકસ્માત બાદ ચાલક ટ્રકની કેબિનમાં જ ફસાઈ જતાં સ્થાનિકોએ ભારે જહેમત બાદ તેનું રેસ્ક્યુ કર્યું હતું. મળતી માહિતી મુજબ, ઘઉં ભરેલી ટ્રક ઇન્દોરથી અમદાવાદ તરફ જઈ રહી હતી. દરમિયાન ગરબાડા ચોકડી નજીક આગળ જઈ રહેલી ફોરવ્હીલ કારને બચાવવાનો પ્રયાસ કરતાં ટ્રક ચાલકે વાહન પરથી કાબૂ ગુમાવ્યો હતો.

કાબૂ ગુમાવતા ટ્રક રસ્તાની બાજુ તરફ ધસી ગઈ હતી અને ત્યાં ઊભેલી અન્ય એક ટ્રકને પાછળથી જોરદાર ટક્કર મારી હતી. બંને ભારે વાહનો વચ્ચે થયેલી ટક્કર એટલી જોરદાર હતી કે ટ્રકની કેબિનનો ભાગ ક્ષતિગ્રસ્ત થયો હતો અને ટ્રક ચાલક તેમાં જ ગંભીર રીતે ફસાઈ ગયો હતો.

કારને બચાવવા જતા ટ્રક બેકાબુ થઈ

અકસ્માતનો અવાજ સાંભળતા અને ઘટનાની જાણ થતાં આસપાસના સ્થાનિક લોકો તાત્કાલિક ઘટનાસ્થળે દોડી આવ્યા હતા. ટ્રક ચાલક કેબિનમાં ફસાયેલો હોવાનું જણાતા લોકોએ તેને બહાર કાઢવા માટે પ્રયાસો શરૂ કર્યા હતા. ભારે જહેમત બાદ ચાલકને કેબિનમાંથી બહાર કાઢવામાં આવ્યો હતો. અકસ્મતમાં ટ્રક ચાલકને પગના ભાગે ગંભીર ઈજાઓ પહોંચી હોવાનું જાણવા મળ્યું છે. રેસ્ક્યુ બાદ તેને તાત્કાલિક સારવાર માટે હોસ્પિટલ ખસેડવામાં આવ્યો હતો.

હાલ તેને તબીબી સારવાર આપવામાં આવી રહી છે. ઘટનાની જાણ થતાં પોલીસ પણ તાત્કાલિક ઘટનાસ્થળે પહોંચી હતી. પોલીસે અકસ્માત અંગે જરૂરી કાર્યવાહી હાથ ધરી હતી અને સમગ્ર ઘટનાની તપાસ શરૂ કરી હતી. અકસ્માત કયા ચોક્કસ સંજોગોમાં સર્જાયો અને કારને બચાવતી વખતે ટ્રક કેવી રીતે કાબૂ બહાર ગઈ તે અંગે પણ તપાસ કરવામાં આવી રહી છે.

વાહનોની અવરજવર પણ પ્રભાવિત થઈ હતી

અકસ્માતના પગલે ઇન્દોર-અમદાવાદ હાઈવે પર થોડા સમય માટે વાહનોની અવરજવર પણ પ્રભાવિત થઈ હતી. પોલીસ દ્વારા ઘટનાસ્થળે જરૂરી વ્યવસ્થા કરી વાહન વ્યવહારને સુચારૂ બનાવવાના પ્રયાસો કરવામાં આવ્યા હતા. આ અકસ્માતમાં સદનસીબે સ્થાનિકોની સમયસર મદદ મળતા કેબિનમાં ફસાયેલા ટ્રક ચાલકને જીવતા બહાર કાઢી સારવાર માટે મોકલી શકાયા હતા. હાલ સમગ્ર મામલે પોલીસ દ્વારા વધુ તપાસ હાથ ધરવામાં આવી છે અને અકસ્માતના ચોક્કસ કારણ અંગેની વિગતો તપાસ પૂર્ણ થયા બાદ સામે આવી શકે છે.

આ પણ વાંચો : Amreli : લો બોલો, એમ્બ્યુલન્સમાં દર્દી નહી પણ દારૂ મળી આવ્યો, બુટલેગરે અપનાવ્યો નવતર કીમિયો