Vaibhav Sooryavanshi: વૈભવ સૂર્યવંશી ભારતીય ક્રિકેટનો નવો ‘વન્ડરકિડ’ બનીને સામે આવ્યો છે. તેની વિસ્ફોટક બેટિંગે ક્રિકેટ જગતનું ધ્યાન પોતાની તરફ ખેંચ્યું છે. ઘણા ક્રિકેટ નિષ્ણાતોનું માનવું છે કે, જો વૈભવ ક્યારેય IPL ઓક્શનમાં સામેલ થશે, તો તેના માટે 30 કરોડ રૂપિયા સુધીની બોલી લાગી શકે છે.

હાલમાં વૈભવ રાજસ્થાન રોયલ્સ સાથે 1.10 કરોડ રૂપિયાના વાર્ષિક કરાર હેઠળ રમે છે. જો કે, તેની IPL સેલેરીમાં વધારો થવા માટે તેને કદાચ એક વર્ષ વધુ રાહ જોવી પડી શકે છે. પરંતુ ઉદ્યોગના જાણકારોના જણાવ્યા મુજબ, માત્ર 15 વર્ષની ઉંમરે જ તેણે પોતાની બ્રાન્ડ એન્ડોર્સમેન્ટ ફી લગભગ બમણી કરી દીધી છે.

IPL 2026ની સિઝન વૈભવ માટે શાનદાર રહી હતી. તેણે સમગ્ર ટૂર્નામેન્ટમાં 776 રન નોંધાવ્યા હતા અને તેનો સ્ટ્રાઈક રેટ 237.30 રહ્યો હતો, જે એક નવો માપદંડ સાબિત થયો. તેના આ ઉત્કૃષ્ટ પ્રદર્શનના કારણે તેને પ્રતિષ્ઠિત ‘ઓરેન્જ કેપ’ તેમજ ‘મોસ્ટ વેલ્યુએબલ પ્લેયર’ (MVP) જેવા મહત્વપૂર્ણ એવોર્ડ્સ મળ્યા હતા.

વૈભવના માતા-પિતા તેના બ્રાન્ડ એન્ડોર્સમેન્ટ સંબંધિત કાર્યોનું સંચાલન કરી રહ્યા છે. જ્યારે તેની IPL ફ્રેન્ચાઇઝી રાજસ્થાન રોયલ્સ પણ આ બાબતમાં સહયોગ આપી રહી છે. વૈભવ અત્યાર સુધી કોમ્પ્લાન અને રેડ બુલ જેવી જાણીતી બ્રાન્ડ્સના પ્રચારમાં જોવા મળ્યો છે. IPLમાં તેના શાનદાર પ્રદર્શન બાદ હવે અનેક મોટી કંપનીઓ તેને પોતાની બ્રાન્ડ સાથે જોડવા માટે ઉત્સુક છે.

એક ખાનગી ચેનલ સાથે વાત કરતા ઉદ્યોગના એક જાણકારે નામ જાહેર ન કરવાની શરતે જણાવ્યું કે, વૈભવે એન્ડોર્સમેન્ટ ફી લગભગ બમણી કરી દીધી છે. તેમના જણાવ્યા અનુસાર, ‘IPL પહેલા વૈભવે કેટલીક બ્રાન્ડ્સ સાથે આશરે 1 કરોડ રૂપિયાની ડીલ કરી હતી, પરંતુ હવે તે એક એન્ડોર્સમેન્ટ માટે 1.5થી 2 કરોડ રૂપિયાની માગ કરી રહ્યો છે. કોમ્પ્લાન અને રેડ બુલ સાથે પણ તેની ડીલ લગભગ 1 કરોડ રૂપિયાની રેન્જમાં થઈ હતી. હવે તેના માર્કેટ વેલ્યુમાં નોંધપાત્ર વધારો થયો છે.’

માત્ર 15 વર્ષની ઉંમરે વૈભવ સૂર્યવંશી પોતાના ક્રિકેટ કરિયરની શરૂઆતના તબક્કામાં છે. IPL 2026માં મળેલી સફળતાએ તેની બ્રાન્ડ વેલ્યુને નવી ઊંચાઈઓ પર પહોંચાડી છે. ઘણા પૂર્વ ક્રિકેટરો, દિગ્ગજો અને નિષ્ણાતોએ તો અત્યારથી જ તેની સરખામણી સચિન તેંડુલકર, વિરાટ કોહલી અને સુનીલ ગાવસ્કર જેવા મહાન ખેલાડીઓ સાથે કરવાનું શરૂ કરી દીધું છે.