મુંબઈ: બોલિવૂડના ખેલાડી અક્ષય કુમારની બહુપ્રતિક્ષિત કોમેડી-એન્ટરટેઇનર ફિલ્મ *'વેલકમ ટુ ધ જંગલ'*નો ટ્રેલર આજે રિલીઝ થતાં જ સોશિયલ મીડિયા પર છવાઈ ગયો છે. એક્શન, કોમેડી, રોમાન્સ, ડ્રામા અને સસ્પેન્સનો ભરપૂર તડકો ધરાવતા આ ટ્રેલરે ચાહકોમાં ભારે ઉત્સાહ જગાવ્યો છે.

આશરે 4 મિનિટ 10 સેકન્ડ લાંબા ટ્રેલરમાં સ્ટાર્સની મોટી ફોજ જોવા મળે છે, જે દર્શકોને હાસ્ય અને મનોરંજનનો ડબલ ડોઝ આપવાની તૈયારીમાં છે. ટ્રેલરની શરૂઆત પરેશ રાવલથી થાય છે, જે એક ફિલ્મ બનાવવાનું સપનું જોઈ રહ્યા છે. ત્યારબાદ ફિલ્મના તમામ પાત્રોનો પરિચય કરાવવામાં આવે છે અને જંગલમાં શરૂ થાય છે એક અનોખું સાહસ.

ટ્રેલરમાં પરેશ રાવલ પોતાની ટીમને સમજાવે છે કે તેમની ફિલ્મ આર્મી પર આધારિત છે, જેના માટે તમામ કલાકારોને ખાસ ટ્રેનિંગ આપવામાં આવશે. આ દરમિયાન લારા દત્તાની એન્ટ્રી થાય છે અને તાલીમ દરમિયાન કલાકારો વચ્ચેની રમૂજી નોકઝોક દર્શકોને પેટ પકડીને હસાવશે.

અક્ષય કુમાર પોતાની શાનદાર કોમિક ટાઈમિંગ અને જબરદસ્ત એક્શનથી ફરી એકવાર છવાઈ જાય છે. બીજી તરફ સુનીલ શેટ્ટી, અરશદ વારસી, તુષાર કપૂર, જેકી શ્રોફ અને રાજપાલ યાદવ જેવા કલાકારો પણ પોતાના અંદાજમાં મનોરંજનનો તડકો લગાવતા જોવા મળે છે.

ફિલ્મમાં રસપ્રદ વળાંક ત્યારે આવે છે જ્યારે આખી ટીમ એક ગામમાં પહોંચી જાય છે. ગામલોકો તેમને સાચા સૈનિકો સમજી લે છે અને મદદની આશા રાખે છે. આ દરમિયાન રવીના ટંડનની એન્ટ્રી ફિલ્મની કહાનીને વધુ રસપ્રદ બનાવી દે છે.

ટ્રેલરની સૌથી ખાસ વાત એ છે કે તેમાં ઘણા કલાકારોના વાસ્તવિક જીવન સાથે જોડાયેલા રમૂજી સંદર્ભો પણ ઉમેરવામાં આવ્યા છે. સાથે જ અક્ષય કુમાર અને સુનીલ શેટ્ટીને લાંબા સમય બાદ ફરી એકસાથે સ્ક્રીન શેર કરતા જોવું ચાહકો માટે ખાસ આકર્ષણ બન્યું છે.

અહમદ ખાનના દિગ્દર્શનમાં બનેલી આ ફિલ્મ લોકપ્રિય 'વેલકમ' ફ્રેન્ચાઇઝીની ત્રીજી કડી છે. ફિલ્મમાં અક્ષય કુમાર, સુનીલ શેટ્ટી, પરેશ રાવલ, રાજપાલ યાદવ, જૉની લીવર, જેકલીન ફર્નાન્ડિઝ, દિશા પટણી, કૃષ્ણા અભિષેક, તુષાર કપૂર, જેકી શ્રોફ, અરશદ વારસી અને રવીના ટંડન સહિતના અનેક જાણીતા કલાકારો જોવા મળશે.