જૂનાગઢ વંથલી શહેર અને તાલુકામાં રવિવારે મોડી રાત્રે મેઘરાજાએ જોરદાર બેટિંગ કરતાં સમગ્ર વિસ્તારમાં ઠંડક પ્રસરી ગઈ હતી. વરસાદ શરૂ થતાં પહેલાં આકાશમાં વીજળીના કડાકા-ભડાકા થયા હતા, ત્યારબાદ ધીમીધારે શરૂ થયેલો વરસાદ થોડા જ સમયમાં ધોધમાર વરસાદમાં ફેરવાયો હતો.

ધોધમાર વરસાદને કારણે શહેરના અનેક મુખ્ય માર્ગો પર પાણી ફરી વળ્યાં હતા. નીચાણવાળા વિસ્તારોમાં પણ વરસાદી પાણી ભરાતા વાહનચાલકોને થોડી મુશ્કેલીનો સામનો કરવો પડ્યો હતો. જોકે, લાંબા સમયથી પડી રહેલી અસહ્ય ગરમી અને વરસાદના વિલંબ બાદ મેઘરાજાની એન્ટ્રીથી લોકોમાં રાહતનો માહોલ જોવા મળ્યો હતો.

વંથલી તાલુકાના વિવિધ ગામોમાં પણ સારો વરસાદ નોંધાતા ખેડૂતોમાં ખુશીની લાગણી છવાઈ ગઈ હતી. વરસાદથી ખેતી માટે અનુકૂળ માહોલ સર્જાતા ખેડૂતોએ હવે વાવણીની તૈયારીઓ તેજ કરી દીધી છે અને સારા ચોમાસાની આશા વ્યક્ત કરી રહ્યા છે.

મોડી રાત્રે પડેલા વરસાદથી સમગ્ર વિસ્તારમાં વાતાવરણ ખુશનુમા બની ગયું હતું. ગરમીથી પરેશાન લોકોને ઠંડકનો અનુભવ થયો હતો અને વરસાદને લઈને લોકોમાં આનંદનો માહોલ જોવા મળ્યો હતો.