વડોદરા: શહેરના પ્રતાપનગર વિસ્તારમાં આવેલા મહાનગર વુડા આવાસમાં બે પક્ષો વચ્ચે ઉગ્ર મારામારીની ઘટના સામે આવી છે. ઘટનાનો વીડિયો સોશિયલ મીડિયા પર વાયરલ થતાં વિસ્તારમાં ચકચાર મચી ગઈ છે.

વાયરલ વીડિયોમાં બંને પક્ષના લોકો એકબીજા પર હુમલો કરતા અને ધક્કામુક્કી કરતા જોવા મળી રહ્યા છે. જાહેરમાં બનેલી આ ઘટનાને લઈને સ્થાનિક રહિશોમાં ભય અને રોષનો માહોલ જોવા મળી રહ્યો છે.

ઘટનાની જાણ થતાં પોલીસ હરકતમાં આવી છે અને વાયરલ વીડિયો તેમજ અન્ય પુરાવાઓના આધારે તપાસ શરૂ કરી છે. મારામારીમાં સંડોવાયેલા શખ્સોની ઓળખ મેળવવા તેમજ સમગ્ર ઘટનાક્રમની હકીકત જાણવા પોલીસ દ્વારા કાર્યવાહી હાથ ધરવામાં આવી છે.

હાલ મારામારી પાછળનું ચોક્કસ કારણ સામે આવ્યું નથી. જોકે, શહેરમાં છેલ્લા કેટલાક સમયથી જાહેરમાં મારામારી અને ધિંગાણાની વધતી ઘટનાઓને લઈને નાગરિકોમાં ચિંતા વ્યાપી છે.

આ ઘટનાએ ફરી એકવાર શહેરની કાયદો અને વ્યવસ્થાની સ્થિતિ અંગે સવાલો ઊભા કર્યા છે. પોલીસે મામલાની ગંભીરતાથી તપાસ શરૂ કરી છે અને જવાબદારો સામે કાયદેસરની કાર્યવાહી કરવામાં આવશે તેમ જાણવા મળ્યું છે.