દક્ષિણ ભારતીય ફિલ્મ ઈન્ડસ્ટ્રીની જાણીતી અભિનેત્રી સામંથા રૂથ પ્રભુ ફરી એકવાર ચર્ચામાં આવી છે. જોકે આ વખતે કારણ તેમની કોઈ ફિલ્મ નહીં પરંતુ તેમની પ્રેગ્નન્સીને લઈને સોશિયલ મીડિયા પર ચાલી રહેલી અટકળો છે. અભિનેત્રીની કેટલીક તાજેતરની તસવીરો વાયરલ થતાં ચાહકોમાં ચર્ચાનો માહોલ સર્જાયો છે.

હાલમાં સામંથાની ફિલ્મ ‘મા ઇન્ટી બંગારમ’ની સફળતાનો જશ્ન મનાવવામાં આવ્યો હતો. આ પ્રસંગે અભિનેત્રી કેક કટિંગ સેલિબ્રેશનમાં હાજર રહી હતી. કાર્યક્રમ દરમિયાન લેવામાં આવેલી તસવીરો સોશિયલ મીડિયા પર ઝડપથી વાયરલ થઈ રહી છે. તસવીરોમાં સામંથા સ્કાય બ્લૂ ટી-શર્ટ અને બ્લૂ જીન્સમાં જોવા મળી હતી. કેટલાક સોશિયલ મીડિયા યુઝર્સે તેમના લુકને આધારે બેબી બમ્પ હોવાનો દાવો કર્યો છે, જેના કારણે તેમની પ્રેગ્નન્સીની ચર્ચાઓ શરૂ થઈ ગઈ છે.

વાયરલ તસવીરો બાદ ચાહકો તરફથી સતત અભિનંદનના સંદેશાઓ આવી રહ્યા છે. કેટલાક યુઝર્સે ખુશી વ્યક્ત કરતાં લખ્યું કે તેઓ સામંથા માટે ખૂબ જ ખુશ છે. જોકે કેટલાક લોકોનું માનવું છે કે તસવીરોમાં દેખાતો ફેરફાર માત્ર વજન વધવાને કારણે પણ હોઈ શકે છે. કેટલાકે તો તસવીરોની સચ્ચાઈ અંગે પણ પ્રશ્નો ઉઠાવ્યા છે.

મહત્વપૂર્ણ વાત એ છે કે અત્યાર સુધી સામંથા રૂથ પ્રભુ અથવા તેમના પતિ રાજ નિદિમોરૂ તરફથી પ્રેગ્નન્સી અંગે કોઈ સત્તાવાર જાહેરાત કરવામાં આવી નથી. તેથી હાલમાં ચાલી રહેલી તમામ ચર્ચાઓ માત્ર સોશિયલ મીડિયા પરની અટકળો જ માનવામાં આવી રહી છે.

ઉલ્લેખનીય છે કે સામંથાએ ડિસેમ્બર 2025માં ફિલ્મમેકર રાજ નિદિમોરૂ સાથે લગ્ન કર્યા હતા. તે પહેલાં તેઓ અભિનેતા નાગા ચૈતન્ય સાથે લગ્નબંધનમાં બંધાયા હતા, પરંતુ 2021માં બંનેએ અલગ થવાનો નિર્ણય જાહેર કર્યો હતો.