રાજકોટ: રાજકોટના ભાવનગર રોડ પર આવેલી ઠાકરધણી હોટલમાં કિચન વિસ્તારમાં થયેલા બ્લાસ્ટમાં એક યુવકનું કરુણ મોત નિપજ્યું છે. મૃતકની ઓળખ રાજસ્થાનના અરવિંદસિંહ તરીકે થઈ છે. બ્લાસ્ટની સમગ્ર ઘટના CCTV કેમેરામાં કેદ થઈ ગઈ છે, જેના દ્રશ્યો પણ સામે આવ્યા છે.

પ્રાથમિક માહિતી મુજબ, અરવિંદસિંહ છેલ્લા સાત મહિનાથી ઠાકરધણી હોટલમાં નોકરી કરી રહ્યો હતો. પરિવારનું ગુજરાન ચલાવવા અને આર્થિક રીતે સહારો આપવા માટે તે રાજસ્થાનથી રાજકોટ આવ્યો હતો. પરંતુ અચાનક થયેલા બ્લાસ્ટે તેના સપનાઓને અધૂરા છોડી દીધા.

પરિવારજનોના જણાવ્યા અનુસાર, થોડા સમય પહેલા જ અરવિંદસિંહના પિતાનું અવસાન થયું હતું. પિતાના નિધન બાદ પરિવારની જવાબદારી તેના ખભા પર આવી પડી હતી. ઘરની આર્થિક સ્થિતિ મજબૂત બનાવવા માટે તે રાજકોટમાં મહેનત મજૂરી કરી રહ્યો હતો, પરંતુ દુર્ભાગ્યે આ અકસ્માતે તેનો જીવ લઈ લીધો.

યુવાન પુત્રના અચાનક મોતના સમાચાર મળતા પરિવાર પર દુઃખનો પહાડ તૂટી પડ્યો છે. પરિવારજનોના આક્રંદથી સમગ્ર ગામમાં શોકનું મોજું ફરી વળ્યું છે. બીજી તરફ બ્લાસ્ટના કારણોને લઈને તપાસ શરૂ કરવામાં આવી છે.