PM Modi Indonesia Visit: વડાપ્રધાન નરેન્દ્ર મોદીએ મંગળવારે ઇન્ડોનેશિયાના રાષ્ટ્રપતિ પ્રબોવો સુબિયાન્તો સાથે દ્વિપક્ષીય બેઠક યોજી હતી. બેઠક દરમિયાન બંને દેશો વચ્ચે ઊર્જા, વેપાર, દરિયાઈ સહયોગ, સંરક્ષણ અને ડિજિટલ અર્થતંત્ર સહિતના વિવિધ ક્ષેત્રોમાં વ્યાપક વ્યૂહાત્મક ભાગીદારીને વધુ મજબૂત બનાવવા અંગે ચર્ચા કરવામાં આવી હતી.

આ બેઠકમાં સંરક્ષણ અને દરિયાઈ સહયોગને વધુ મજબૂત બનાવવાની સાથે મહત્વપૂર્ણ ખનિજ, ખાદ્ય સુરક્ષા અને ડિજિટલ અર્થતંત્રમાં સહકાર વધારવા પર ખાસ ભાર મૂકવામાં આવ્યો હતો. આ ઉપરાંત મે 2018માં સ્થાપિત ભારત-ઇન્ડોનેશિયા વ્યાપક વ્યૂહાત્મક ભાગીદારી હેઠળ થયેલી પ્રગતિની પણ સમીક્ષા કરવામાં આવી હતી.

ઇન્ડોનેશિયામાં ભારતના રાજદૂત સંદીપ ચક્રવર્તીએ જણાવ્યું હતું કે, બંને નેતાઓ પ્રમ્બાનન મંદિર પરિસરમાં સંરક્ષણ અને પુનઃસ્થાપન કાર્ય શરૂ કરવાની જાહેરાત પણ કરી શકે છે.

આ પહેલાં જકાર્તાના મર્ડેકા પેલેસ (રાષ્ટ્રપતિ ભવન) ખાતે વડાપ્રધાન મોદીના સન્માનમાં ઔપચારિક સ્વાગત સમારોહ યોજાયો હતો. આ દરમિયાન ભારત અને ઇન્ડોનેશિયા વચ્ચે અનેક એમઓયુ (MoU) અને દ્વિપક્ષીય કરારો પર હસ્તાક્ષર થવાની પણ અપેક્ષા વ્યક્ત કરવામાં આવી હતી.

વડાપ્રધાન મોદીએ જકાર્તામાં મળેલા ભવ્ય સ્વાગતનો વીડિયો સોશિયલ મીડિયા પ્લેટફોર્મ 'એક્સ' પર શેર કરતાં લખ્યું હતું કે, "ગઈ સાંજે જકાર્તામાં મળેલું વિશેષ સ્વાગત અવિસ્મરણીય રહ્યું. આજે રાષ્ટ્રપતિ પ્રબોવો સુબિયાન્તો સાથેની ચર્ચાની આતુરતાથી રાહ જોઈ રહ્યો છું."

વડાપ્રધાનના સ્વાગત માટે સ્કૂલના વિદ્યાર્થીઓ ભારત અને ઇન્ડોનેશિયાના રાષ્ટ્રીય ધ્વજ સાથે હાજર રહ્યા હતા. વડાપ્રધાન મોદીએ તેમની પાસે જઈ અભિવાદન સ્વીકાર્યું હતું. સમારોહ દરમિયાન રાષ્ટ્રપતિ પ્રબોવો સુબિયાન્તોએ વડાપ્રધાન મોદીને ઉષ્માભર્યું આલિંગન આપી આવકાર્યા હતા.

ત્યારબાદ વડાપ્રધાન મોદીએ ઇન્ડોનેશિયાના વરિષ્ઠ અધિકારીઓ અને મંત્રીઓ સાથે મુલાકાત કરી હતી. બંને દેશોના પ્રતિનિધિમંડળો વચ્ચે પણ પરિચય કાર્યક્રમ યોજાયો હતો. વડાપ્રધાન મોદીએ ઇસ્તાના મર્ડેકા સ્થિત ગેસ્ટ બુકમાં હસ્તાક્ષર પણ કર્યા હતા.

બેઠક પહેલાં વડાપ્રધાન મોદીએ રાષ્ટ્રપતિ પ્રબોવો સુબિયાન્તો દ્વારા એરપોર્ટ પર વ્યક્તિગત રીતે કરાયેલા સ્વાગતની પ્રશંસા કરી હતી. તેમણે જણાવ્યું કે, આ ઉષ્માભર્યું સ્વાગત બંને દેશો વચ્ચેના ગાઢ સંબંધોને વધુ મજબૂત બનાવે છે.

વડાપ્રધાન મોદીએ જણાવ્યું કે, વર્ષ 2018માં ભારત અને ઇન્ડોનેશિયાના સંબંધોને વ્યાપક વ્યૂહાત્મક ભાગીદારીનું સ્વરૂપ આપવામાં આવ્યું હતું, જેના લાભ બંને દેશોના નાગરિકોને મળ્યા છે. આ મુલાકાત દરમિયાન બંને દેશો વચ્ચેના સહકારને વધુ વિસ્તૃત બનાવવા માટે મહત્વપૂર્ણ ચર્ચા કરવામાં આવશે.