WPL Auctionને લઈને મોટી જાહેરાત, કોચીમાં લગાવવામાં આવશે બોલી, આ દિવસથી શરૂ થશે મેચ

WPL Auction: વિમેન્સ પ્રીમિયર લીગની આગામી સીઝન માટેની તૈયારીઓ હવે તેજ થઈ ગઈ છે. ખેલાડીઓના રિટેનશન અને રિલીઝથી લઈને ઓક્શન સુધી, ચિત્ર ધીમે ધીમે સ્પષ્ટ થઈ રહ્યું છે. 16 સપ્ટેમ્બરના રોજ BCCI એ 5 WPL ફ્રેન્ચાઈઝીઓને સીઝન 5ની ઓક્શનની તારીખ અને સ્થળ વિશે માહિતી આપી. ખેલાડીઓનો ઓક્શન 28 ઓક્ટોબરના રોજ કોચીમાં યોજાશે.

મીડિયા રિપોર્ટ મુજબ BCCIએ બુધવારે પાંચેય ટીમો સાથે ઓક્શન સંબંધિત માહિતી ઔપચારિક રીતે શેર કરી હતી. ફ્રેન્ચાઈઝી પાસે હવે તેમની ટીમમાં ફેરફાર કરવા માટે વધુ સમય નથી. બધી ટીમોએ 28 સપ્ટેમ્બર સુધીમાં તેમના ખેલાડીઓને રીટેન્શન અને રિલીઝ કરવાનો નિર્ણય લેવો પડશે. અગાઉ, ઈન્ડિયન પ્રીમિયર લીગના ઓક્શન અંગે મહત્વપૂર્ણ સમાચાર સામે આવ્યા હતા .

ઓક્શન પહેલા રીટેન્શન મહત્વપૂર્ણ રહેશે

WPL ટીમમાં વધુમાં વધુ 18 ખેલાડીઓ હોઈ શકે છે, જેમાં વધુમાં વધુ 6 વિદેશી ખેલાડીઓનો સમાવેશ થાય છે. વર્તમાન ચક્ર માટે ટીમની પગાર મર્યાદા 15 કરોડ રૂપિયા નક્કી કરવામાં આવી છે. તેથી બધી ફ્રેન્ચાઈઝીઓ ઓક્શન પહેલાં ખેલાડીઓને રિલીઝ અને રિટેન્શન અંગેના નિર્ણયો પર નજીકથી નજર રાખશે.

ઓક્શનની તારીખ જાહેર થતાં આગામી સિઝન માટેના સ્થળો અંગેનું ચિત્ર વધુ સ્પષ્ટ થઈ ગયું છે. આગામી સિઝન માટે મુંબઈ અને વડોદરાને સ્થળો તરીકે પસંદ કરવામાં આવે તેવી શક્યતા છે. WPL ની આગામી સિઝન ગયા વર્ષની જેમ જાન્યુઆરી-ફેબ્રુઆરી દરમિયાન યોજાવાની શક્યતા છે.

https://twitter.com/wplt20/status/2100183451987227062

વારાણસીમાં કેટલીક મેચો યોજવાની ચર્ચા હતી, પરંતુ હાલમાં આ અશક્ય માનવામાં આવે છે. શહેરમાં એક નવું સ્ટેડિયમ બનાવવામાં આવી રહ્યું છે, અને WPL જેવી મોટી ટુર્નામેન્ટ માટે મેચોનું આયોજન કરતા પહેલા સ્થાનિક ક્રિકેટ મેચો દ્વારા મેદાનની તૈયારીનું પરીક્ષણ કરવાની જરૂર પડશે. મળતી માહિતી મુજબ વારાણસીમાં મેચનું આયોજન કરવાનો નિર્ણય સંપૂર્ણપણે સ્ટેડિયમની તૈયારી પર નિર્ભર રહેશે. વર્તમાન પરિસ્થિતિમાં ત્યાં લીગ મેચો યોજાવાની શક્યતા ખૂબ ઓછી છે.

મુંબઈ અને વડોદરા સ્થળો હશે

ગયા સિઝનની જેમ મુંબઈનું CCI અને વડોદરાનું કોટંબી સ્ટેડિયમ આગામી સિઝન માટે મુખ્ય સ્થળો હશે. સિઝન 4 ની મેચ પણ આ બે સ્થળોએ રમાઈ હતી, અને ફાઈનલ 5 ફેબ્રુઆરીએ વડોદરામાં યોજાઈ હતી. રોયલ ચેલેન્જર્સ બેંગલુરુ ગત WPL ચેમ્પિયન છે. બધી ટીમો હવે 28 ઓક્ટોબરના રોજ ઓક્શન પર ધ્યાન કેન્દ્રિત કરશે, જ્યાં આગામી સિઝન માટે તેમની ટીમોને મજબૂત બનાવવાના પ્રયાસો કરવામાં આવશે.

આ પણ વાંચો: ICC Rankingમાં અભિષેક શર્માએ મચાવી ધૂમ, તિલક વર્માને થયું નુકસાન