Iran America Conflict : અમેરિકાના પ્રતિબંધોને ઈરાને ગણાવ્યા ગેરકાયદેસર, હવાઈ સેવાઓ ફરી શરૂ કરવા ઈરાકને અપીલ

Iran America Conflict : ઈરાન અને અમેરિકા વચ્ચેના તણાવની અસર હવે ઈરાન અને ઈરાક વચ્ચેના વેપાર તથા હવાઈ પરિવહન પર પણ જોવા મળી રહી છે. ઈરાનના વિદેશ મંત્રાલયે અમેરિકી પ્રતિબંધોને ગેરકાયદે અને અમાનવીય ગણાવી તેની ટીકા કરી છે. સાથે જ ઈરાકને અપીલ કરી છે કે તે અમેરિકાના આર્થિક દબાણ અને પ્રતિબંધોની અસર દૂર કરવા માટે યોગ્ય પગલાં ભરે, જેથી બંને દેશો વચ્ચે સામાન્ય હવાઈ સેવાઓ ફરી શરૂ થઈ શકે.

બંને દેશોના સંબંધો માત્ર રાજકીય પરિસ્થિતિઓ પર આધારિત નથી

ભારતમાં ઈરાનના દૂતાવાસે સોશિયલ મીડિયા પ્લેટફોર્મ 'એક્સ' પર એક પોસ્ટ દ્વારા ઈરાનના વિદેશ મંત્રાલયની આ પ્રતિક્રિયા જાહેર કરી હતી. તેમાં જણાવાયું હતું કે અમેરિકી સરકાર ઈરાન અને અન્ય દેશો વચ્ચેના વેપાર તેમજ હવાઈ પરિવહનમાં અવરોધ ઊભો કરી રહી છે. ઈરાનના મતે આવા પ્રતિબંધો સંયુક્ત રાષ્ટ્રના ચાર્ટર અને આંતરરાષ્ટ્રીય કાયદાના મૂળભૂત સિદ્ધાંતોની વિરુદ્ધ છે. ઈરાનના વિદેશ મંત્રાલયે ઈરાન અને ઈરાક વચ્ચેના ઐતિહાસિક, ધાર્મિક અને સાંસ્કૃતિક સંબંધોનો ઉલ્લેખ કરતાં કહ્યું હતું કે બંને દેશોના સંબંધો માત્ર રાજકીય પરિસ્થિતિઓ પર આધારિત નથી, પરંતુ બંને દેશોના લોકો વચ્ચેના લાંબા સમયથી ચાલતા સંપર્ક અને પરસ્પર હિતો સાથે જોડાયેલા છે.

વેપારીઓને મુશ્કેલી

મંત્રાલયના જણાવ્યા અનુસાર, દર વર્ષે લાખો ઈરાની અને ઈરાકી નાગરિકો વેપાર, આર્થિક પ્રવૃત્તિઓ, ધાર્મિક યાત્રા, પ્રવાસન, શિક્ષણ અને સારવાર માટે બંને દેશો વચ્ચે મુસાફરી કરે છે. હવાઈ સેવાઓ પરના નિયંત્રણોને કારણે મોટી સંખ્યામાં મુસાફરો, દર્દીઓ, વિદ્યાર્થીઓ અને વેપારીઓને મુશ્કેલીઓનો સામનો કરવો પડી રહ્યો છે. ઈરાને વધુમાં જણાવ્યું હતું કે હવાઈ પરિવહન પરના પ્રતિબંધો બંને દેશોના હિતોને નુકસાન પહોંચાડે છે. આ મુદ્દે ઈરાકે સ્વતંત્ર અને જવાબદારીપૂર્વક નિર્ણય લેવો જોઈએ, જેથી બંને દેશો વચ્ચેની સામાન્ય હવાઈ અવરજવર પુનઃસ્થાપિત થઈ શકે.

ઈરાનના વિદેશ મંત્રાલયે ઈરાકની રાષ્ટ્રીય સંપ્રભુતાનું સન્માન કરવાની વાત પણ કરી હતી. સાથે જ અમેરિકાના આર્થિક દબાણ અને પ્રતિબંધોની અસર દૂર કરવા માટે ઈરાકને યોગ્ય પગલાં ભરવાની અપીલ કરી હતી. ઈરાનના મતે, હવાઈ સેવાઓ ફરી શરૂ થવાથી બંને દેશોની સરકારો અને નાગરિકોના હિતોને લાભ થશે. જોકે, આ તમામ બાબતો ઈરાનના વિદેશ મંત્રાલય દ્વારા રજૂ કરવામાં આવેલા દાવા અને વલણ પર આધારિત છે.

આ પણ વાંચો : INS Tarkash કેન્યાના મોમ્બાસાથી રવાના, ભારત-કેન્યા વચ્ચે દરિયાઈ સહયોગ વધુ મજબૂત