INS Tarkash કેન્યાના મોમ્બાસાથી રવાના, ભારત-કેન્યા વચ્ચે દરિયાઈ સહયોગ વધુ મજબૂત

INS Tarkash : ભારતીય નૌકાદળનું અગ્રણી ગાઈડેડ મિસાઈલ યુદ્ધજહાજ INS તરકશ કેન્યાના મોમ્બાસામાં સફળ મુલાકાત પૂર્ણ કર્યા બાદ રવાના થયું છે. આ મુલાકાતથી ભારત અને પૂર્વ આફ્રિકાના દેશ કેન્યા વચ્ચે દરિયાઈ સહયોગ, સંરક્ષણ સંબંધો અને પરસ્પર મિત્રતાને વધુ મજબૂતી મળી છે. મોમ્બાસાથી વિદાય લેતી વખતે INS તરકશે કેન્યાના નૌકાદળના જહાજ KNS Jasiri સાથે સંયુક્ત દરિયાઈ અભ્યાસ 'પેસેજ એક્સરસાઈઝ' (PASSEX)માં ભાગ લીધો હતો.

દરિયાઈ સુરક્ષા માટે સાથે મળીને કામગીરી કરવાની ક્ષમતા મજબૂત કરાઈ

નૈરોબી સ્થિત ભારતીય હાઈ કમિશને સોશિયલ મીડિયા પ્લેટફોર્મ 'એક્સ' પર આ અંગેની માહિતી આપી હતી. આ સંયુક્ત અભ્યાસનો મુખ્ય હેતુ બંને દેશોના નૌકાદળ વચ્ચે તાલમેલ વધારવા અને દરિયાઈ સુરક્ષા માટે સાથે મળીને કામગીરી કરવાની ક્ષમતા મજબૂત કરવાનો હતો. INS તરકશની મુલાકાત દરમિયાન ભારતીય અને કેન્યાના નૌકાદળના અધિકારીઓ તથા જવાનો વચ્ચે વ્યાવસાયિક ચર્ચા અને તાલીમ સત્રોનું પણ આયોજન કરવામાં આવ્યું હતું. જેમાં જહાજ પર અધિકારીઓની જવાબદારીઓ, સુરક્ષા વ્યવસ્થા તેમજ ઇલેક્ટ્રિકલ અને એન્જિનિયરિંગ સંબંધિત જાળવણી જેવા વિષયો પર માહિતીની આપ-લે કરવામાં આવી હતી.

સામાન્ય નાગરિકો માટે પણ યુદ્ધજહાજના દરવાજા ખોલવામાં આવ્યા

કેન્યાના નૌકાદળના તબીબી અધિકારીઓને INS તરકશ પર ઉપલબ્ધ ટેલિમેડિસિન સુવિધા વિશે પણ જાણકારી આપવામાં આવી હતી. આ ઉપરાંત, બંને દેશો વચ્ચે લોકોના પરસ્પર સંપર્કને પ્રોત્સાહન આપવા માટે પણ વિવિધ પ્રવૃત્તિઓ યોજાઈ હતી. INS તરકશ પર મટવાપા સ્થિત સહજાનંદ સ્પેશિયલ ચિલ્ડ્રન સ્કૂલના આશરે 100 બાળકો સહિત અન્ય મુલાકાતીઓનું સ્વાગત કરવામાં આવ્યું હતું. સામાન્ય નાગરિકો માટે પણ યુદ્ધજહાજના દરવાજા ખોલવામાં આવ્યા હતા. INS તરકશના કમાન્ડિંગ ઓફિસર કેપ્ટન રોહિત મિશ્રાએ કેન્યા નેવી બેઝ મટોંગવેના કમાન્ડર બ્રિગેડિયર વિલિયમ કિપરોટિચ સાથે મુલાકાત કરી હતી. કેન્યાના નૌકાદળ દ્વારા ભારતીય જવાનો અને અધિકારીઓ માટે રાત્રિભોજનનું પણ આયોજન કરવામાં આવ્યું હતું.

આ મુલાકાત દરમિયાન ભારતના કેન્યામાં ઉચ્ચાયુક્ત આદર્શ સ્વૈકા અને કેપ્ટન રોહિત મિશ્રાએ જહાજ પર ડેક રિસેપ્શનનું આયોજન કર્યું હતું. તેમાં કેન્યાના નૌકાદળના અધિકારીઓ, વિવિધ દેશોના રાજદ્વારીઓ અને ભારતીય સમુદાયના સભ્યો ઉપસ્થિત રહ્યા હતા. આ સમગ્ર મુલાકાતથી પશ્ચિમ હિંદ મહાસાગર ક્ષેત્રમાં દરિયાઈ સુરક્ષા, પ્રાદેશિક શાંતિ અને ભારત-કેન્યા વચ્ચેની મિત્રતાને વધુ મજબૂત બનાવવાનો સંદેશ મળ્યો છે.

આ પણ વાંચો : Piyush Goyal અમેરિકાના પ્રવાસે, ભારતમાં રોકાણ અને મેન્યુફેક્ચરિંગ કરવા મામલે કરી ચર્ચા