Brazil : રાષ્ટ્રપતિ લુઈઝ ઈનાસિયો લૂલા દા સિલ્વાનો ચૂંટણી પહેલા મોટો નિર્ણય, ફિક્સ્ડ-ઓડ્સ ઓનલાઈન બેટિંગ પર મુક્યો પ્રતિબંધ

Brazil : બ્રાઝિલના રાષ્ટ્રપતિ લુઈઝ ઈનાસિયો લૂલા દા સિલ્વાએ રાષ્ટ્રપતિ ચૂંટણીના પ્રથમ તબક્કાના મતદાનના થોડા દિવસો પહેલાં ફિક્સ્ડ-ઓડ્સ બેટિંગ પર પ્રતિબંધ મૂકવાનો નિર્ણય લીધો છે. 25 સપ્ટેમ્બરે હસ્તાક્ષર કરાયેલા વચગાળાના આદેશ હેઠળ દેશમાં આવી બેટિંગના સંચાલન, ઓફર, મધ્યસ્થી અને જાહેરાત પર પ્રતિબંધ મૂકવામાં આવ્યો છે.

25 સપ્ટેમ્બરથી બેટિંગ પ્લેટફોર્મ પર નવા નાણાં જમા કરાવવાની મનાઈ

સરકારના જણાવ્યા મુજબ ઓનલાઈન બેટિંગના કારણે લોકો આર્થિક મુશ્કેલી અને દેવામાં ફસાઈ રહ્યા છે. સરકાર તેને જાહેર આરોગ્ય અને પરિવારની આર્થિક સુરક્ષા સાથે જોડાયેલો મુદ્દો માની રહી છે. જોકે, આ વચગાળાના આદેશને કાયમી રાખવા માટે 120 દિવસમાં કોંગ્રેસની મંજૂરી જરૂરી રહેશે. આ નિર્ણય મુજબ 25 સપ્ટેમ્બરથી બેટિંગ પ્લેટફોર્મ પર નવા નાણાં જમા કરાવવાની મનાઈ છે. હાલના યુઝર્સને પોતાનો બાકીનો નાણાકીય જથ્થો ઉપાડવા માટે 5 ઓક્ટોબર રાત્રે 11:59 વાગ્યા સુધીનો સમય આપવામાં આવ્યો છે. 6 ઓક્ટોબરથી બેટિંગની વેબસાઈટ અને એપ્લિકેશન બંધ કરવાની પ્રક્રિયા શરૂ થશે. ત્યારબાદ બાકી રહેલી રકમ બેન્કિંગ સિસ્ટમ મારફતે ગ્રાહકોને પરત કરવામાં આવશે.

કોંગ્રેસમાં બિલ રજૂ કરવાની પણ તૈયારી

બ્રાઝિલમાં ફિક્સ્ડ-ઓડ્સ બેટિંગ ક્ષેત્રને તાજેતરના વર્ષોમાં નિયમન હેઠળ લાવવામાં આવ્યું હતું. સરકારના જણાવ્યા મુજબ અત્યાર સુધી 85 લાઈસન્સ આપવામાં આવ્યા હતા અને દરેક માટે 3 કરોડ બ્રાઝિલિયન રિયાલની ફી લેવામાં આવી હતી, એટલે કુલ રૂ. 2.55 અબજ રિયાલની રકમ મળી હતી. સરકારે બેટિંગ સંબંધિત કેટલીક પ્રવૃત્તિઓને ગુનાની શ્રેણીમાં લાવવા માટે કોંગ્રેસમાં બિલ રજૂ કરવાની પણ તૈયારી કરી છે. બીજી તરફ, બેટિંગ ઉદ્યોગ સાથે જોડાયેલા પક્ષો આ નિર્ણયને કાયદાકીય રીતે પડકારી શકે છે તેવી શક્યતા વ્યક્ત થઈ છે. આ નિર્ણય 4 ઓક્ટોબરના રાષ્ટ્રપતિ ચૂંટણીના પ્રથમ તબક્કાના મતદાન પહેલાં લેવાયો છે. લૂલા ફરી ચૂંટણી લડી રહ્યા છે, જેના કારણે નિર્ણયનો રાજકીય સંદર્ભ પણ ચર્ચામાં છે.

આ પણ વાંચો : America-Chinaએ ટ્રેડ ટ્રુસ 10 જાન્યુઆરી 2027 સુધી લંબાવ્યો, મોટા વેપાર કરાર અંગે ચર્ચા ચાલુ