Delhi Building Collapse: દિલ્હીના ચાવડી બજારમાં ત્રણ માળની ઈમારત ધરાશાયી, 2નાં મોત, અનેક લોકો દટાયા હોવાની આશંકા

Delhi Building Collapse: નવી દિલ્હીના ચાવડી બજારમાં ગુરુવાર 5 નવેમ્બરે સવારે એક નિર્માણાધીન ત્રણ માળની ઈમારત ધરાશાયી થતાં મોટી દુર્ઘટના સર્જાઈ હતી. આ ઘટનામાં અત્યાર સુધીમાં 2 લોકોનાં મોત થયા છે, જ્યારે 1 વ્યક્તિને ઈજાગ્રસ્ત હાલતમાં બહાર કાઢવામાં આવ્યો છે. કાટમાળ નીચે હજુ પણ અનેક લોકો દટાયા હોવાની આશંકા છે. ઘટનાને પગલે સમગ્ર વિસ્તારમાં અફરાતફરીનો માહોલ સર્જાયો છે.

સવારે આશરે 9:50 વાગ્યે ઈમારત ધરાશાયી થઈ

પ્રાપ્ત માહિતી અનુસાર, ચાવડી બજાર મેટ્રો સ્ટેશન નજીક આવેલી ગલી સિતારામાં સવારે આશરે 9:50 વાગ્યે ઈમારત ધરાશાયી થવાની જાણ કરવામાં આવી હતી. ઘટનાની માહિતી મળતાં જ ફાયર વિભાગની 6 ગાડીઓ ઘટનાસ્થળે પહોંચી હતી. હાલમાં પોલીસ, ફાયર વિભાગ અને બચાવદળ દ્વારા કાટમાળ હટાવીને ફસાયેલા લોકોને બહાર કાઢવાની કામગીરી ચાલી રહી છે.

સ્થાનિક લોકોના જણાવ્યા અનુસાર, ઈમારતનું બાંધકામ થોડા મહિના પહેલાં જ શરૂ થયું હતું. દુર્ઘટના સમયે ત્યાં 3 મજૂરો કામ કરી રહ્યા હતા. ઈમારત ધરાશાયી થતાં તેઓ પણ કાટમાળ નીચે ફસાયા હોવાની આશંકા છે. સ્થાનિકોએ જણાવ્યું કે અચાનક જોરદાર ધડાકા જેવો અવાજ સંભળાયો હતો. ત્યારબાદ લોકો ઘરની બહાર દોડી આવ્યા હતા. સમગ્ર રસ્તા પર કાટમાળ ફેલાઈ ગયો હતો અને રસ્તો બંધ કરવો પડ્યો હતો.

વરિષ્ઠ અધિકારીઓ ઘટનાસ્થળે હાજર

અધિકારીઓના જણાવ્યા મુજબ, વરિષ્ઠ અધિકારીઓ ઘટનાસ્થળે હાજર છે અને બચાવ કામગીરીનું નિરીક્ષણ કરી રહ્યા છે. કાટમાળમાં ફસાયેલા લોકોની ચોક્કસ સંખ્યા હજુ સ્પષ્ટ નથી.

દિવાળીને કારણે બજારોમાં ભીડ હોય છે

ચાવડી બજાર અને તેની આસપાસનો જૂની દિલ્હી વિસ્તાર જથ્થાબંધ વેપાર અને ખરીદી માટે જાણીતો છે. દિવાળી દરમિયાન, ચાંદની ચોક અને ચાવડી બજાર જેવા વિસ્તારોમાં દુકાનદારોની અવરજવર વધી જાય છે. તેથી અકસ્માત બાદ બચાવ કામગીરી સાથે વિસ્તારની પરિસ્થિતિ પર નજર રાખવામાં આવી રહી છે. ઈમારત ધરાશાયી થવાનું કારણ હાલમાં અજ્ઞાત છે.

આ પણ વાંચો: Meghalaya Politics: મેઘાલયમાં UDPને મોટો ઝટકો, 12માંથી 11 ધારાસભ્યનો પક્ષપલટો, ભાજપની તાકાતમાં વધારો