Vadodara News : પિતૃ મોક્ષ માટે ચાંદોદમાં ઉમટ્યો શ્રદ્ધાનો મહાસાગર, નર્મદા કિનારે પિતૃ મોક્ષનું પવિત્ર ધામ

Vadodara News : સર્વ પિતૃ મોક્ષ માટે ગુજરાતના પૌરાણિક તીર્થધામ દક્ષિણ પ્રયાગ ચાંદોદમાં શ્રદ્ધાળુઓનો પ્રવાહ જોવા મળી રહ્યો છે. દેશના વિવિધ રાજ્યોમાંથી ભક્તો અહીં પહોંચી પિતૃ તર્પણ, શ્રાદ્ધ વિધિ અને પિંડદાન કરી રહ્યા છે.

આ વર્ષે ભાદરવા સુદ પૂર્ણિમાથી શ્રાદ્ધ પક્ષનો પ્રારંભ થયો છે અને ભાદરવા વદ સર્વ પિતૃ અમાસ સુધી વિવિધ તિથિઓ દરમિયાન પિતૃઓનું સ્મરણ કરવામાં આવી રહ્યું છે. તિથિઓના ક્ષયને કારણે આ વર્ષે 16 દિવસના ગણાતા શ્રાદ્ધ પક્ષની વિધિઓ 15 દિવસમાં પૂર્ણ થવાની સ્થિતિ છે.

ચાંદોદને પુરાણોમાં દક્ષિણ પ્રયાગ તરીકે ઓળખાય છે

વડોદરા જિલ્લાના ચાંદોદને પુરાણોમાં દક્ષિણ પ્રયાગ તરીકે ઓળખવામાં આવે છે. અહીં નર્મદા, ઓરસંગ અને સરસ્વતી નદીઓના ત્રિવેણી સંગમનું ધાર્મિક મહત્વ માનવામાં આવે છે. શ્રદ્ધાળુઓ નર્મદા નદીમાં પવિત્ર સ્નાન કર્યા બાદ તીર્થ પુરોહિતોની હાજરીમાં શ્રાદ્ધ વિધિ, પિતૃ તર્પણ અને પિંડદાન કરે છે.

ધાર્મિક માન્યતા અનુસાર, ચાંદોદમાં પિતૃઓના નિમિત્તે કરવામાં આવતી શ્રાદ્ધ વિધિ અને તર્પણથી પિતૃઓને સદગતિ મળે છે અને પરિવાર પર તેમના આશીર્વાદ રહે છે. આસ્થા સાથે દેશભરમાંથી આવતા શ્રદ્ધાળુઓ પોતાના પૂર્વજોના સ્મરણાર્થે અહીં વિવિધ ધાર્મિક વિધિઓ કરી રહ્યા છે.

શ્રાદ્ધ પક્ષ શરૂ થતાં જ ચાંદોદ તીર્થમાં ભક્તોની અવરજવર વધી છે

ગુજરાત ઉપરાંત મહારાષ્ટ્ર, રાજસ્થાન, મધ્યપ્રદેશ અને ઉત્તર ભારતના વિવિધ વિસ્તારોમાંથી પણ શ્રદ્ધાળુઓ ચાંદોદ પહોંચી રહ્યા છે. તીર્થગોર પાસે વિધિ કરાવી નર્મદા સ્નાન અને પિતૃ તર્પણ કરી પૂર્વજોની આત્માની શાંતિ માટે પ્રાર્થના કરવામાં આવી રહી છે.

સ્થાનિક તીર્થ પુરોહિતોના જણાવ્યા મુજબ, શ્રાદ્ધ પક્ષ દરમિયાન પિતૃઓના નિમિત્તે કરવામાં આવતા દાન, તર્પણ અને શ્રાદ્ધ વિધિનું વિશેષ ધાર્મિક મહત્વ છે. શ્રદ્ધાળુઓ પોતાના પરિવારની પરંપરા અને ધાર્મિક માન્યતા મુજબ વિધિઓ કરી રહ્યા છે. હાલ દક્ષિણ પ્રયાગ ચાંદોદમાં પિતૃ પક્ષને લઈને વિશેષ ધાર્મિક માહોલ જોવા મળી રહ્યો છે. નર્મદા કિનારે શ્રદ્ધાળુઓની ભીડ અને વિવિધ ધાર્મિક વિધિઓના કારણે સમગ્ર ચાંદોદ તીર્થ આસ્થાના રંગે રંગાયું છે.

આ પણ વાંચો : Surat News : ભાડા વિધેયક-2026નો વિરોધ ઉગ્ર બન્યો, સુરતના વકીલો આજે પણ હડતાળ પર