Surat News: ઉમરપાડાના બિલવણ ગામે તાપી-કરજણ લિંક યોજનાની પાઈપલાઈન તૂટી, ખેડૂતોના ખેતર બન્યા જળબંબાકાર

Surat News: સુરત જિલ્લાના ઉમરપાડા તાલુકાના બિલવણ ગામે તાપી-કરજણ લિંક યોજનાની પાણીની પાઈપલાઈન તૂટી જતાં ખેડૂતોની મુશ્કેલીમાં વધારો થયો છે. ગત રોજ પાઈપલાઈન તૂટવાની ઘટનાને પગલે ખેતરોમાં પાણી ફરી વળ્યું હતું અને કેટલાક ખેતરોમાં જળબંબાકાર જેવી સ્થિતિ સર્જાઈ હતી. ખેતરોમાં પાણી ભરાઈ જતાં ખેડૂતોમાં ચિંતા જોવા મળી રહી છે.

કામગીરી અને ગુણવત્તા અંગે સવાલો ઊભા થયા

તાપી-કરજણ લિંક યોજના ખેડૂતો માટે સિંચાઈની દૃષ્ટિએ આશીર્વાદ સમાન માનવામાં આવે છે. ખેડૂતોને ખેતી માટે પૂરતું પાણી મળી રહે તે હેતુથી કરોડો રૂપિયાના ખર્ચે આ યોજના તૈયાર કરવામાં આવી હતી. જોકે, યોજના શરૂ થયાના એક વર્ષની અંદર જ પાઈપલાઈન તૂટી જવાની ઘટના સામે આવતાં તેની કામગીરી અને ગુણવત્તા અંગે સવાલો ઊભા થયા છે.

સ્થાનિક ખેડૂતોમાં નારાજગી જોવા મળી

પાઈપલાઈન તૂટતાં તેમાંથી મોટા પ્રમાણમાં પાણી ખેતરોમાં ફરી વળ્યું હતું. જેના કારણે ખેતરોમાં ઊભા પાકને નુકસાન થવાની ભીતિ સેવાઈ રહી છે. ખેડૂતો માટે સિંચાઈની સુવિધા ઊભી કરવાના હેતુથી બનાવવામાં આવેલી યોજનામાં આ પ્રકારની ઘટના બનતાં સ્થાનિક ખેડૂતોમાં નારાજગી જોવા મળી રહી છે. આ ઘટનાને પગલે તાપી-કરજણ લિંક યોજનાની પાઈપલાઈનના કામમાં ભ્રષ્ટાચાર થયો હોવાની ચર્ચાઓ પણ ઊઠી છે. જોકે, આ અંગે સત્તાવાર તપાસના પરિણામો સામે આવ્યા નથી અને ભ્રષ્ટાચારના આક્ષેપોની પુષ્ટિ થવાની બાકી છે.

પાઈપલાઈન તૂટવાની ઘટનાની જાણ થતાં તંત્ર દ્વારા તાત્કાલિક પગલાં લેવામાં આવ્યા હતા. હાલમાં તાપી-કરજણ લિંક યોજનામાં પાણીનો પ્રવાહ બંધ કરીને પાઈપલાઈનના સમારકામની કામગીરી શરૂ કરવામાં આવી છે. હવે ખેડૂતોને થયેલા સંભવિત નુકસાનનું મૂલ્યાંકન, પાઈપલાઈન તૂટવાનું ચોક્કસ કારણ અને યોજનાની કામગીરીની ગુણવત્તા અંગે તપાસ કરવામાં આવે છે કે નહીં તેના પર સૌની નજર છે. ખેડૂતોને રાહત મળે અને આવી ઘટના ફરી ન બને તે માટે તંત્ર દ્વારા યોગ્ય પગલાં લેવામાં આવે તેવી માગ ઊઠી રહી છે.

આ પણ વાંચો: Sabarkantha: જિલ્લા પોલીસ દ્વારા ધાર્મિક વિધિ સાથે શસ્ત્રોનું પૂજન કરાયું