Surat : કામરેજના ઘલા ગામે કરોડોની જમીન પચાવી પાડવાના મામલે ત્રણ આરોપીઓની ધરપકડ, લેન્ડ ગ્રેબિંગ એક્ટ હેઠળ કરાઈ કાર્યવાહી

Surat : સુરત જિલ્લાના કામરેજ તાલુકાના ઘલા ગામે કરોડોની કિંમતની જમીન પચાવી પાડવાના કથિત મામલે પોલીસ દ્વારા મોટી કાર્યવાહી કરવામાં આવી છે. વિદેશમાં રહેતા જમીન માલિકોની કિંમતી જમીન પર તેમની સંમતિ વિના ગેરકાયદે કબજો જમાવ્યાના આક્ષેપસર કામરેજ પોલીસે ત્રણ આરોપીઓની ધરપકડ કરી છે. સુરત કલેક્ટરના હુકમ બાદ પોલીસે કાર્યવાહી હાથ ધરી ગણતરીના કલાકોમાં જ ત્રણેય આરોપીઓને ઝડપી પાડ્યા હતા.

કાયદેસરની કાર્યવાહી કરવાની પ્રક્રિયા હાથ ધરવામાં આવી

મળતી માહિતી મુજબ, ઘલા ગામમાં આવેલી જમીનના બ્લોક નંબર 667 અને 827ને લઈને ગેરકાયદે કબજાનો મામલો સામે આવ્યો હતો. આ જમીન વિદેશમાં રહેતા જમીન માલિકોની હોવાનું જણાવવામાં આવી રહ્યું છે. જમીન માલિકોની સંમતિ વિના જમીન પર કબજો જમાવી તેનો ઉપયોગ કરવામાં આવતો હોવાનો આક્ષેપ ફરિયાદમાં કરવામાં આવ્યો છે. આ ઉપરાંત, કથિત રીતે જમીન પર ગેરકાયદે કબજો કર્યા બાદ ત્યાં શેરડીનું વાવેતર કરવામાં આવતું હોવાનો પણ ખુલાસો થયો છે. જમીન પચાવી પાડવાના આ મામલાને ગંભીરતાથી લઈને સુરત કલેક્ટરના હુકમ બાદ લેન્ડ ગ્રેબિંગ એક્ટ હેઠળ ફરિયાદ નોંધવાની અને કાયદેસરની કાર્યવાહી કરવાની પ્રક્રિયા હાથ ધરવામાં આવી હતી.

પોલીસે 3 આરોપીઓને ઝડપ્યા

આ કેસમાં કામરેજ પોલીસે ઝડપી કાર્યવાહી કરીને ઘલા ગામના રહેવાસી મોહમદ ઉમરખાન પઠાણ, હમઝાખાન પઠાણ અને હુઝૈકાખાન પઠાણની ધરપકડ કરી છે. ત્રણેય આરોપીઓ સામે જમીન પર ગેરકાયદે કબજો જમાવવાના આક્ષેપોને લઈને કાયદેસરની કાર્યવાહી આગળ ધપાવવામાં આવી રહી છે. વિદેશમાં રહેતા જમીન માલિકોની કિંમતી મિલકત પર કથિત ગેરકાયદે કબજાનો આ મામલો સામે આવતાં સ્થાનિક સ્તરે ચર્ચા જાગી છે. હાલ કામરેજ પોલીસ દ્વારા સમગ્ર પ્રકરણમાં વધુ તપાસ હાથ ધરવામાં આવી રહી છે. જમીનના કબજા, વાવેતર અને અન્ય સંબંધિત પાસાં અંગે તપાસ પૂર્ણ થયા બાદ વધુ વિગતો સામે આવી શકે છે.

આ પણ વાંચો : Surat : ડોકટર હર્ષ પંડ્યા આપઘાત મામલો, ખટોદરા પોલીસે વધુ એક ડોક્ટરની કરી ધરપકડ