Surat : ‘સુદામા કા રાજા’ના દરબારમાં બાપ્પા બિરાજમાન, મહિલાઓને આત્મનિર્ભર બનાવવાનો અનોખો પ્રયાસ

Surat : ગણેશ મહોત્સવ દરમિયાન ભક્તિ સાથે વ્યસનમુક્તિ, દેશભક્તિ અને મહિલા સશક્તિકરણનો સંદેશ પણ આપવામાં આવી રહ્યો છે. ‘સુદામા કા રાજા’ના દર્શન માટે દરરોજ મોટી સંખ્યામાં ભક્તો પહોંચતા હોવાનું આયોજકો દ્વારા જણાવાયું છે.

ગણેશ મહોત્સવને માત્ર ધાર્મિક ઉજવણી પૂરતો મર્યાદિત ન રાખીને સામાજિક સંદેશ સાથે જોડવાનો પ્રયાસ કરવામાં આવ્યો છે. આ મહોત્સવનું ખાસ આકર્ષણ મહિલાઓને આત્મનિર્ભર બનાવવાની પહેલ છે. મહિલાઓ દ્વારા ઘરે બનાવવામાં આવતી વિવિધ વસ્તુઓને બજાર મળી રહે અને તેઓ પોતાની પ્રોડક્ટ વેચીને આર્થિક રીતે પગભર બની શકે તે હેતુથી સ્ટોલની ફાળવણી કરવામાં આવી છે.

દેશભક્તિ અને મહિલા સશક્તિકરણનો સંગમ

ખાણીપીણીની વસ્તુઓથી લઈને ઘરગથ્થુ અને હોમમેડ પ્રોડક્ટ્સ બનાવતી મહિલાઓને અહીં પોતાના વ્યવસાયના પ્રચાર અને વેચાણ માટે પ્લેટફોર્મ આપવામાં આવ્યું છે. આ પહેલના કારણે મહિલાઓને પોતાની આવડત અને મહેનતને વ્યવસાયમાં પરિવર્તિત કરવાની તક મળી રહી છે. આયોજકોનો હેતુ મહિલાઓને માત્ર સ્ટોલ પૂરતો અવસર આપવાનો નહીં, પરંતુ તેમની બનાવેલી વસ્તુઓને લોકો સુધી પહોંચાડીને રોજગારી અને સ્વરોજગાર માટે પ્રોત્સાહિત કરવાનો છે.

ગણેશ મહોત્સવમાં આવતા ભક્તો પણ મહિલા સંચાલિત વિવિધ સ્ટોલની મુલાકાત લઈ તેમની પ્રોડક્ટ્સ ખરીદી રહ્યા છે. મહિલાઓએ પણ તેમને આ પ્રકારની તક આપવા બદલ સંસ્થા અને આયોજકોનો આભાર માન્યો છે.

બાપ્પાના આશીર્વાદ સાથે મહિલાઓને રોજગાર!

મહિલાઓ માટે બનાવવામાં આવેલા આ પ્લેટફોર્મથી તેમને પોતાના વ્યવસાયને આગળ વધારવા અને ગ્રાહકો સાથે સીધો સંપર્ક કરવાની તક મળી રહી છે. આ વિશેષ ગણેશ મહોત્સવના કાર્યક્રમમાં ધારાસભ્ય અને વિધાનસભાના ડેપ્યુટી સ્પીકર પુરણેશ મોદી તેમજ ગુજરાત ભાજપ મહિલા મોરચાના પ્રમુખ અંજુબેન વેકરિયા સહિતના મહાનુભાવો ઉપસ્થિત રહ્યા હતા. ‘સુદામા કા રાજા’ના દરબારમાં ધાર્મિક વાતાવરણ સાથે સામાજિક જાગૃતિનો સંદેશ પણ આપવામાં આવી રહ્યો છે.

વ્યસનમુક્તિ અને દેશભક્તિના સંદેશ સાથે મહિલા સશક્તિકરણને પ્રોત્સાહન આપતી આ પહેલ ગણેશ મહોત્સવને સામાજિક જોડાણનું માધ્યમ બનાવી રહી છે. મોટા વરાછામાં યોજાઈ રહેલા આ ગણેશ મહોત્સવ દરમિયાન આગામી દિવસોમાં પણ મોટી સંખ્યામાં ભક્તો બાપ્પાના દર્શન માટે પહોંચે તેવી અપેક્ષા છે. આમ, ભક્તિ સાથે રોજગાર અને આત્મનિર્ભરતાનો સંદેશ આપતો ‘સુદામા કા રાજા’ ગણેશ મહોત્સવ સુરતમાં ચર્ચાનું કેન્દ્ર બન્યો છે.

આ પણ વાંચો : Surat : તરસાડી-કોસંબામાં આજથી ગરબાનો રંગ જામશે, પાંચમા રોટરી નવરાત્રી મહોત્સવનો શુભારંભ