Nadiad : એન.ડી.દેસાઈ હોસ્પિટલમાં 16 વર્ષના કિશોરનું પેરાથાઈરોઈડ એડેનોમાનું સફળ ઓપરેશન કરાયું

Nadiad : ડૉ. એન. ડી. દેસાઈ હોસ્પિટલના ENT વિભાગ દ્વારા 16 વર્ષના કિશોરમાં જમણી બાજુની ઇન્ફિરિયર પેરાથાઇરોઇડ ગ્રંથિના એડેનોમાનું સફળતાપૂર્વક ઓપરેશન કરવામાં આવ્યું છે. વિભાગના વડા ડૉ. સુપ્રીત પ્રભુના માર્ગદર્શન હેઠળ સમગ્ર ENT ટીમે આ સર્જરી સફળતાપૂર્વક પૂર્ણ કરી હતી. ઓપરેશન દરમિયાન એનેસ્થેસિયા ટીમે પણ દર્દીની સ્થિતિનું સતત મોનિટરિંગ, એનેસ્થેસિયા વ્યવસ્થાપન અને સુરક્ષિત સર્જિકલ પ્રક્રિયા સુનિશ્ચિત કરવામાં મહત્વપૂર્ણ ભૂમિકા ભજવી હતી.

ફ્રેક્ચરની તપાસ દરમિયાન બીમારીનું નિદાન

16 વર્ષનો કિશોર ડાબા પગમાં ફ્રેક્ચરની ફરિયાદ સાથે હોસ્પિટલમાં આવ્યો હતો. વધુ તપાસ દરમિયાન તેના લોહીમાં કેલ્શિયમ અને પેરાથાઇરોઇડ હોર્મોન (PTH)નું પ્રમાણ વધેલું જોવા મળ્યું હતું. નેકના અલ્ટ્રાસાઉન્ડમાં જમણી બાજુની પેરાથાઇરોઇડ ગ્રંથિમાં એડેનોમા હોવાની શક્યતા જણાઈ હતી. વધુ નિદાન માટે સેસ્ટામિબી ન્યુક્લિયર સ્કેન કરાવવામાં આવ્યું હતું, જેમાં જમણી બાજુની ઈન્ફિરિયર પેરાથાઈરોઈડ ગ્રંથિના એડેનોમા સાથે સુસંગત તારણો મળ્યા હતા. દર્દીને હૃદયમાં નાનું કાણું હોવાની તબીબી સમસ્યા પણ હતી.

તમામ તપાસ અને તબીબી મૂલ્યાંકન બાદ દર્દીની જમણી ઈન્ફિરિયર પેરાથાઈરોઈડ ગ્રંથિમાં રહેલા એડેનોમાને સર્જરી દ્વારા સફળતાપૂર્વક દૂર કરવામાં આવ્યો હતો. ઓપરેશન દરમિયાન એનેસ્થેસિયા ટીમે દર્દીની હૃદયસંબંધિત સ્થિતિને ધ્યાનમાં રાખીને જરૂરી સાવચેતી સાથે એનેસ્થેસિયા આપ્યું અને સમગ્ર પ્રક્રિયા દરમિયાન મહત્વપૂર્ણ પરિમાણોનું સતત નિરીક્ષણ કર્યું. ઓપરેશન બાદ દર્દીની સ્થિતિ સ્થિર છે અને તેનું સીરમ PTH સ્તર હાલમાં સામાન્ય છે. દર્દીની જરૂરિયાત મુજબ કેલ્શિયમ અને મેગ્નેશિયમનું મોનિટરિંગ તથા પૂરક સારવાર આપવામાં આવી રહી છે.

પેરાથાઈરોઈડ એડેનોમા શું છે ?

પેરાથાઈરોઈડ ગ્રંથિઓ ગળામાં થાઈરોઈડ ગ્રંથિની પાછળ આવેલી નાની ગ્રંથિઓ છે. તે પેરાથાઈરોઈડ હોર્મોન (PTH) ઉત્પન્ન કરે છે, જે શરીરમાં કેલ્શિયમનું સંતુલન જાળવવામાં મહત્ત્વપૂર્ણ ભૂમિકા ભજવે છે. આ ગ્રંથિમાં સામાન્ય રીતે બિનકૅન્સરયુક્ત ગાંઠ વિકસે ત્યારે તેને પેરાથાઈરોઈડ એડેનોમા કહેવામાં આવે છે. તેના કારણે PTHનું પ્રમાણ વધી શકે છે અને લોહીમાં કેલ્શિયમનું પ્રમાણ અસામાન્ય રીતે ઊંચું થઈ શકે છે. આ સ્થિતિને હાઈપરપેરાથાઈરોઈડિઝમ કહેવામાં આવે છે.

પેરાથાઈરોઈડ એડેનોમાના લક્ષણો અને સંભવિત જટિલતાઓ

• આ બીમારીમાં શરૂઆતમાં કોઈ સ્પષ્ટ લક્ષણો ન પણ હોય. જોકે, કેલ્શિયમનું પ્રમાણ વધવાથી નીચેની સમસ્યાઓ થઈ શકે છે

• હાડકાં પર અસર

• હાડકાં નબળાં પડવાં, હાડકાંમાં દુખાવો અને ફ્રેક્ચર થવાનું જોખમ વધવું.

• કિડનીની સમસ્યાઓ: કિડનીમાં પથરી થવી, વારંવાર પથરી થવી અને ગંભીર અથવા લાંબા સમયની સ્થિતિમાં કિડનીના કાર્ય પર અસર થવી

• પાચનતંત્રની તકલીફો

• ઉબકા, ઊલટી, કબજિયાત, ભૂખ ઓછી લાગવી અને પેટમાં દુખાવો.

• સ્નાયુઓ અને સામાન્ય સ્વાસ્થ્ય: સ્નાયુઓમાં નબળાઈ, થાક અને શરીરમાં ઊર્જા ઓછી લાગવી.

• માનસિક અને નર્વસ સિસ્ટમ સંબંધિત લક્ષણો: એકાગ્રતામાં મુશ્કેલી, મૂડમાં ફેરફાર અને ગૂંચવણ.

• ગંભીર હાઇપરકેલ્સીમિયા: કેલ્શિયમ ખૂબ વધી જાય ત્યારે હૃદયના ધબકારામાં ફેરફાર, ગંભીર નિર્જલીકરણ અને ચેતનામાં ફેરફાર જેવી જટિલતાઓ થઈ શકે છે.

સમયસર નિદાન અને ટીમવર્કનું મહત્ત્વ

સમયસર નિદાન અને યોગ્ય સારવાર ન થાય તો હાડકાં તથા કિડનીને લાંબા ગાળે નુકસાન થવાની શક્યતા રહે છે. આથી, લોહીમાં કેલ્શિયમનું પ્રમાણ વધેલું જણાય, વારંવાર કિડનીમાં પથરી થાય અથવા નાની ઉંમરે અસામાન્ય ફ્રેક્ચર થાય તો તબીબી તપાસ કરાવવી જરૂરી છે. આ કેસમાં નાની ઉંમરના દર્દમાં પેરાથાઈરોઈડ ગ્રંથિની બીમારીનું નિદાન, યોગ્ય તપાસ અને સર્જિકલ સારવારનું મહત્ત્વ સ્પષ્ટ થાય છે. ડૉ. સુપ્રીત પ્રભુના માર્ગદર્શન હેઠળ ENT વિભાગની સમગ્ર ટીમ અને એનેસ્થેસિયા ટીમે સંકલિત રીતે કરેલી આ સફળ કામગીરી હોસ્પિટલની સંકલિત અને દર્દીલક્ષી સારવારનું ઉદાહરણ છે.

આ પણ વાંચો : Jamnagar : સેક્શન રોડના ફેરિયાઓ માટે સુવ્યવસ્થિત વૈકલ્પિક જગ્યાની ફાળવણી કરાઈ, વિક્રેતાઓને મોટી રાહત