Bahucharaji મંદિરના નવીનીકરણમાં ગ્રીન નેટ લગાવાઈ, મંદિર વહીવટદારે જણાવ્યું કારણ

Bahucharaji Temple Renovation: બહુચરાજી મંદિરના નવીનીકરણ દરમિયાન તૂટેલા પથ્થરો લગાવવાના મુદ્દે અગાઉ વિવાદ સર્જાયો હતો. આ મામલે સ્થાનિક ધારાસભ્ય દ્વારા પણ ઉગ્ર રજૂઆત કરવામાં આવી હતી. હવે મંદિરના ચાલી રહેલા નિર્માણ કાર્ય દરમિયાન મંદિર પરિસરમાં લીલી નેટ લગાવવામાં આવી છે. ગ્રીન નેટ લગાવવાને લઈને મંદિરના વહીવટદાર અશોકભાઈ ઠક્કરે નિવેદન આપ્યું છે. તેમના જણાવ્યા મુજબ, મંદિરના નિર્માણ કાર્ય દરમિયાન ઉડતી ધૂળથી શ્રદ્ધાળુઓને બચાવવા માટે આ નિર્ણય લેવામાં આવ્યો છે.

ક્રેનથી ભારે પથ્થરો ઉઠાવાતા સુરક્ષાના ભાગરૂપે કાર્યવાહી

મંદિરના નવીનીકરણ દરમિયાન ભારે પથ્થરોને ક્રેન મારફતે ઉંચકીને સ્થાપિત કરવામાં આવી રહ્યા છે. આ કામગીરી દરમિયાન શ્રદ્ધાળુઓની સુરક્ષાને ધ્યાનમાં રાખીને પણ ગ્રીન નેટ લગાવવામાં આવી હોવાનું મંદિર વહીવટદાર દ્વારા જણાવાયું છે. મંદિર વહીવટદારના જણાવ્યા મુજબ, નિર્માણ કાર્યને કારણે ધૂળ ન ફેલાય અને મંદિર પરિસરમાં આવતા શ્રદ્ધાળુઓને કોઈ મુશ્કેલી ન પડે તે માટે ગ્રીન નેટ ઉપયોગી રહેશે.

નવરાત્રી-દિવાળીમાં લાખો શ્રદ્ધાળુઓ ઉમટવાની શક્યતા

આગામી નવરાત્રી અને દિવાળીના તહેવારો દરમિયાન બહુચરાજી મંદિર ખાતે મોટી સંખ્યામાં શ્રદ્ધાળુઓ ઉમટવાની શક્યતા છે. આ દરમિયાન નિર્માણ કાર્ય પણ ચાલુ હોવાથી શ્રદ્ધાળુઓની સુરક્ષા અને સુવિધાને ધ્યાનમાં રાખીને વ્યવસ્થા કરવામાં આવી રહી છે. મંદિર વહીવટદારના જણાવ્યા પ્રમાણે, યાત્રાધામ વિકાસ બોર્ડની સૂચના મુજબ મંદિર પરિસરમાં ગ્રીન નેટ લગાવવામાં આવી છે. હાલ મંદિરનું નવીનીકરણ કાર્ય ચાલુ છે ત્યારે ગ્રીન નેટને લઈને ફરી ચર્ચા શરૂ થઈ છે. મંદિર વહીવટીતંત્ર દ્વારા તેને શ્રદ્ધાળુઓની સુરક્ષા અને ધૂળથી બચાવ માટેની વ્યવસ્થા ગણાવવામાં આવી છે.