Nadiyad : ચોકસી બજારમાં બાઈક હટાવવા મુદ્દે બબાલ, વેપારીના કર્મચારીઓ સાથે મારામારી

Nadiyad : નડિયાદના ચોકસી બજારમાં દુકાન પાસે બાઈક પાર્ક કરવા જેવી સામાન્ય બાબતે વિવાદ ઉગ્ર બન્યો હતો. બાઈક સાઈડમાં મૂકવાનું કહેતાં બોલાચાલી થઈ હતી, જે બાદ મારામારીની ઘટના બની હતી. આ મામલે નડિયાદ ટાઉન પોલીસ સ્ટેશનમાં ચાર શખ્સો વિરુદ્ધ ફરિયાદ નોંધાઈ છે. સમગ્ર ઘટનાના CCTV ફૂટેજ પણ સામે આવ્યા છે.

ઘટનાને પગલે સમગ્ર મામલો પોલીસ મથકે પહોંચ્યો

મળતી માહિતી મુજબ, નડિયાદના ચોકસી બજારમાં આવેલી એક દુકાન પાસે બાઈક પાર્ક કરવામાં આવ્યું હતું. દુકાનમાં કામ કરતા કર્મચારીએ બાઈકચાલકને બાઈક સાઈડમાં મૂકવા માટે જણાવ્યું હતું. જોકે, બાઈકચાલકે બાઈક હટાવવાનો ઈનકાર કર્યો હોવાનો અને અપશબ્દો બોલી ધમકી આપી હોવાનો આક્ષેપ કરવામાં આવ્યો છે. આ મામલે બંને પક્ષો વચ્ચે બોલાચાલી થતાં વિવાદ વધુ વકર્યો હતો. આ દરમિયાન બાઈકચાલક સાથે આવેલા અન્ય ત્રણ ઈસમોએ દુકાનમાં કામ કરતા બે શખ્સો સાથે મારામારી કરી હોવાની ફરિયાદ નોંધાઈ છે. બાઈક પાર્ક કરવા જેવી બાબતે શરૂ થયેલો વિવાદ મારામારી સુધી પહોંચતાં બજાર વિસ્તારમાં ચર્ચા જાગી છે. ઘટનાને પગલે સમગ્ર મામલો પોલીસ મથકે પહોંચ્યો છે.

CCTV ફૂટેજ સામે આવતાં તપાસ તેજ

આ સમગ્ર ઘટનાના CCTV ફૂટેજ પણ સામે આવ્યા છે, જેના આધારે ઘટનાક્રમ અંગે વધુ વિગતો સામે આવી શકે છે. નડિયાદ ટાઉન પોલીસે ચાર શખ્સો વિરુદ્ધ ફરિયાદ નોંધીને વધુ તપાસ હાથ ધરી છે. પોલીસ દ્વારા ફરિયાદમાં કરવામાં આવેલા આક્ષેપો અને ઘટનાની પરિસ્થિતિ અંગે તપાસ કરવામાં આવી રહી છે. તપાસ પૂર્ણ થયા બાદ ઘટનાની વધુ વિગતો સ્પષ્ટ થશે. નડિયાદના વ્યસ્ત ચોકસી બજારમાં બનેલી આ ઘટનાએ જાહેર સ્થળોએ પાર્કિંગને લઈને થતા વિવાદો અને તેના કારણે ઊભી થતી કાયદો-વ્યવસ્થાની સ્થિતિ અંગે ફરી ચર્ચા જગાવી છે.

આ પણ વાંચો : Gujaratના 136 બસ સ્ટેન્ડ પર શરૂ થયા ગ્રામ હાટ, સખી મંડળોની બહેનોને મળશે મોટું બજાર