Kheda : જિલ્લામાં ફરી એકવાર વરસાદી માહોલ, નડિયાદમાં ધોધમાર વરસાદથી વાહનચાલકો પરેશાન

Kheda : ખેડા જિલ્લામાં ફરી એકવાર વરસાદી માહોલ જોવા મળ્યો છે. નડિયાદ શહેર સહિત જિલ્લાના અનેક વિસ્તારોમાં મેઘરાજાએ ધમાકેદાર એન્ટ્રી કરી છે. નડિયાદ શહેરમાં કાળા ડિબાંગ વાદળો અને વીજળીના ચમકારા સાથે વરસાદ વરસતા સમગ્ર શહેરનું વાતાવરણ બદલાઈ ગયું હતું. વરસાદના કારણે રસ્તાઓ પર પાણી ભરાવાની સાથે વાહનચાલકોને પણ મુશ્કેલીનો સામનો કરવો પડ્યો હતો.

નડિયાદમાં વરસાદ દરમિયાન આકાશમાં કાળા વાદળો છવાઈ ગયા હતા અને વીજળીના ચમકારા જોવા મળ્યા હતા. ત્યારબાદ વરસાદ શરૂ થતાં શહેરના અનેક વિસ્તારોમાં ઠંડક પ્રસરી ગઈ હતી. છેલ્લા કેટલાક સમયથી બફારા અને ગરમીથી પરેશાન લોકોને વરસાદના કારણે રાહત મળી હતી. વરસાદ પડતાં વાતાવરણમાં ઠંડક આવતા શહેરીજનોને ગરમીમાંથી થોડા અંશે છુટકારો મળ્યો હતો.

ભારે વરસાદના કારણે જનજીવન પર અસર

નડિયાદ ઉપરાંત ખેડા જિલ્લાના અનેક તાલુકાઓમાં પણ વરસાદી માહોલ જોવા મળ્યો હતો. જિલ્લાના વિવિધ વિસ્તારોમાં મેઘરાજાની મહેર થતાં ખેડૂતો અને સ્થાનિકોમાં પણ વરસાદને લઈને આશા જાગી છે. જોકે, કેટલાક વિસ્તારોમાં ભારે વરસાદના કારણે જનજીવન પર અસર જોવા મળી હતી.

માર્ગો પર વાહનવ્યવહાર પણ પ્રભાવિત થયો

ભારે વરસાદને કારણે કેટલાક સ્થળોએ વિઝિબિલિટી ઓછી થઈ ગઈ હતી. રસ્તા પર વરસાદનું જોર વધતા વાહનચાલકોને આગળનો રસ્તો સ્પષ્ટ દેખાતો ન હોવાથી વાહન ચલાવવામાં મુશ્કેલી પડી રહી હતી. ખાસ કરીને ભારે વરસાદ દરમિયાન વાહનચાલકોને ધીમી ગતિએ વાહન ચલાવવાની ફરજ પડી હતી.

વરસાદી માહોલ વચ્ચે શહેર અને જિલ્લાના માર્ગો પર વાહનવ્યવહાર પણ પ્રભાવિત થયો હતો. નીચાણવાળા વિસ્તારોમાં પાણી ભરાવાની સ્થિતિ સર્જાય તો મુશ્કેલી વધી શકે તેવી સ્થિતિ વચ્ચે તંત્ર પણ સાવચેતી રાખી રહ્યું છે. હાલ ખેડા જિલ્લામાં વરસાદી માહોલ યથાવત રહેતા આગામી સમયમાં પણ વરસાદની શક્યતા વચ્ચે લોકોમાં ઉત્સુકતા જોવા મળી રહી છે.

આ પણ વાંચો : Suratમાં Zeptoના ગોડાઉનમાં એક્સપાયરી વસ્તુઓ મળી, ₹25 હજારનો દંડ; શોકોઝ નોટિસ