Jamnagar : જાહેરમાં બાયોમેડિકલ વેસ્ટ ફેંકનારા તબીબો સામે JMCની કાર્યવાહી, બે દિવસમાં રૂપિયા 80,000નો દંડ ફટકાર્યો

Jamnagar : જામનગર શહેરમાં જાહેરમાં બાયોમેડિકલ વેસ્ટ ફેંકવાના મામલે જામનગર મહાનગરપાલિકા (JMC) દ્વારા કડક કાર્યવાહી હાથ ધરવામાં આવી છે. સ્વચ્છ ભારત અભિયાન અંતર્ગત શહેરભરમાં કરવામાં આવી રહેલી તપાસ દરમિયાન નિયમોનો ભંગ કરનારા તબીબો સામે દંડાત્મક પગલાં લેવામાં આવ્યાં છે. JMCના જણાવ્યા અનુસાર, છેલ્લા બે દિવસમાં આશરે ₹80 હજારનો દંડ વસૂલવામાં આવ્યો છે.

મહાનગરપાલિકા દ્વારા સઘન ચેકિંગ હાથ ધરવામાં આવ્યું

મળતી માહિતી મુજબ, શહેરમાં સ્વચ્છતા જાળવવા અને જાહેર સ્થળોએ કચરાનો ગેરકાયદેસર નિકાલ અટકાવવા મહાનગરપાલિકા દ્વારા સઘન ચેકિંગ હાથ ધરવામાં આવ્યું છે. આ દરમિયાન અંબર ચોકડી નજીક આવેલા કચરાના પોઈન્ટ પર તપાસ કરતાં બાયોમેડિકલ વેસ્ટ મળી આવ્યો હતો. આ ગંભીર બેદરકારીને ધ્યાનમાં રાખીને સંબંધિત તબીબો સામે કાર્યવાહી કરવામાં આવી હતી. આ કાર્યવાહી અંતર્ગત ડૉ. ઈલાબેન પુનાતર સામે ₹20 હજારનો દંડ ફટકારવામાં આવ્યો હતો. જ્યારે ડૉ. સુરેશભાઈ ઠાકર અને ગાયત્રીબેન ઠાકર સામે પણ દંડાત્મક પગલાં લેવામાં આવ્યાં છે. મહાનગરપાલિકા દ્વારા શહેરના અન્ય વિસ્તારોમાં પણ તપાસ હાથ ધરી નિયમોનું ઉલ્લંઘન કરનારાઓ સામે કાર્યવાહી કરવામાં આવી રહી છે.

લોકોના સ્વાસ્થ્ય અને પર્યાવરણ સામે જોખમ

બાયોમેડિકલ વેસ્ટમાં વપરાયેલી સિરીંજ, દવાઓનો કચરો, દૂષિત ડ્રેસિંગ સામગ્રી અને અન્ય ચેપ ફેલાવી શકે તેવી વસ્તુઓનો સમાવેશ થઈ શકે છે. આવા કચરાનો જાહેર સ્થળોએ નિકાલ કરવાથી લોકોના સ્વાસ્થ્ય અને પર્યાવરણ સામે જોખમ ઊભું થઈ શકે છે. JMC દ્વારા તમામ તબીબો, ક્લિનિકો અને આરોગ્ય સંસ્થાઓને બાયોમેડિકલ વેસ્ટનો જાહેરમાં નિકાલ ન કરવા સૂચના આપવામાં આવી છે. નિયમો અનુસાર આવા કચરાનો વૈજ્ઞાનિક ઢબે અને અધિકૃત વ્યવસ્થા મારફતે નિકાલ કરવા પણ અપીલ કરવામાં આવી છે. મહાનગરપાલિકાએ સ્પષ્ટ સંદેશ આપ્યો છે કે શહેરની સ્વચ્છતા અને જાહેર આરોગ્ય સાથે ચેડાં કરનારાઓ સામે કાર્યવાહી ચાલુ રહેશે. આગામી દિવસોમાં પણ ચેકિંગ વધુ સઘન બનાવવામાં આવે તેવી શક્યતા છે.

આ પણ વાંચો : Dahod : હાંડા હોસ્પિટલમાં રૂપિયા 15.15 લાખની ઘરફોડ ચોરીનો ભેદ ઉકેલાયો, બે આરોપીઓ ઝડપાયા