જામનગરમાં ડુપ્લિકેટ દારૂના કેસમાં ફરાર બે આરોપીઓ ઝડપાયા, રાજસ્થાન-હરિયાણામાંથી LCBએ ઝડપી પાડ્યા

Jamnagar Duplicate Liquor Case: જામનગરમાં ડુપ્લિકેટ ઇંગ્લીશ દારૂના ગુનામાં લાંબા સમયથી ફરાર બે આરોપીઓ સામે જામનગર લોકલ ક્રાઇમ બ્રાન્ચ (LCB)એ મોટી કાર્યવાહી કરી છે. ટેકનિકલ સર્વેલન્સ અને હ્યુમન સોર્સની મદદથી પોલીસે બંને આરોપીઓને રાજસ્થાન અને હરિયાણામાંથી ઝડપી પાડ્યા છે.

હરિયાણામાંથી રોહતાસ સાગવાન ઝડપાયો

જામનગરના નેવીમોડા ગામની વાડીમાં ડુપ્લિકેટ દારૂ બનાવવાના કેસમાં આરોપી રોહતાસ સાગવાન લાંબા સમયથી ફરાર હતો. LCBની ટીમે ટેકનિકલ સર્વેલન્સ અને હ્યુમન સોર્સના આધારે તપાસ આગળ ધપાવી તેનું લોકેશન મેળવ્યું હતું. ત્યારબાદ પોલીસ ટીમ હરિયાણા પહોંચી આરોપીને ઝડપી પાડ્યો હતો.

રાજસ્થાનમાંથી કિશનસિંહ શેખાવત ઝડપાયો

બીજા કેસમાં કનસુમરા-સાઢીયાપુલ નજીક ડુપ્લિકેટ દારૂની ફેક્ટરી ઝડપાઈ હતી. આ કેસમાં મુખ્ય આરોપી તરીકે કિશનસિંહ શેખાવત ફરાર હતો. સતત તપાસ બાદ પોલીસે તેનું લોકેશન ટ્રેસ કરી રાજસ્થાનમાંથી તેને ઝડપી પાડ્યો હતો.

ડુપ્લિકેટ દારૂની ફેક્ટરી પર દરોડામાં મુદ્દામાલ જપ્ત

બંને કેસમાં પોલીસે ડુપ્લિકેટ દારૂ બનાવવામાં ઉપયોગમાં લેવાતી સામગ્રી સહિતનો મુદ્દામાલ જપ્ત કર્યો હતો. જેમાં કેમિકલ, આલ્કોહોલ સ્પિરિટ, કલર, ઢાંકણા, સ્ટીકર તેમજ દારૂ બનાવવાની અન્ય સામગ્રીનો સમાવેશ થાય છે. પોલીસે બંને કેસમાં લાખો રૂપિયાનો મુદ્દામાલ જપ્ત કર્યો હોવાનું સામે આવ્યું છે.

ટેકનિકલ સર્વેલન્સ અને હ્યુમન સોર્સથી આરોપીઓ સુધી પહોંચી પોલીસ

ફરાર આરોપીઓને ઝડપી પાડવા માટે જામનગર LCBની ટીમે ટેકનિકલ સેલની મદદથી સતત તપાસ હાથ ધરી હતી. હ્યુમન સોર્સ પાસેથી મળતી માહિતી અને ટેકનિકલ સર્વેલન્સના આધારે બંને આરોપીઓના લોકેશન અંગે માહિતી મેળવી કાર્યવાહી કરવામાં આવી હતી. આંતરરાજ્ય ઓપરેશન દરમિયાન જામનગર LCB અને જામનગર સિટી-બી ડિવિઝન પોલીસની ટીમોએ હરિયાણા તથા રાજસ્થાન પહોંચી બંને આરોપીઓને ઝડપી પાડ્યા છે. બંને આરોપીઓ સામે હવે કાયદેસરની કાર્યવાહી હાથ ધરવામાં આવી છે.