GMC Elections 2026 : ગાંધીનગર મનપામાં અંદાજિત 60% મતદાન નોંધાયું, 13 ઓક્ટોબરે પરિણામ જાહેર થશે

GMC Elections 2026 : ગુજરાતમાં સ્થાનિક સ્વરાજ્યની સંસ્થાઓની ચૂંટણી અંતર્ગત ગાંધીનગર મહાનગરપાલિકા, ઓખા નગરપાલિકા અને થરા નગરપાલિકામાં મતદાન પ્રક્રિયા પૂર્ણ થઈ છે. મતદાન પૂર્ણ થતાં જ ઉમેદવારોના ભાવિ EVMમાં સીલ થઈ ગયા છે. હવે તમામની નજર આગામી 13 ઓક્ટોબરે જાહેર થનારા પરિણામો પર ટકેલી છે.

ઉમેદવારોના રાજકીય ભાવિનો નિર્ણય EVMમાં કેદ

ગાંધીનગર મહાનગરપાલિકાની ચૂંટણીમાં સાંજે 6 વાગ્યા સુધીમાં સરેરાશ 60 ટકા મતદાન નોંધાયું હતું. સમગ્ર મતદાન પ્રક્રિયા શાંતિપૂર્ણ માહોલમાં પૂર્ણ થઈ હતી. વોર્ડ પ્રમાણે મતદાનના આંકડામાં તફાવત જોવા મળ્યો હતો. વોર્ડ નંબર-4માં સૌથી વધુ અંદાજે 70 ટકા મતદાન નોંધાયું હતું. મતદાન પૂર્ણ થતાં જ તમામ ઉમેદવારોના રાજકીય ભાવિનો નિર્ણય EVMમાં કેદ થયો છે. હવે પરિણામ જાહેર થયા બાદ કયા પક્ષને જનતાનો વધુ ટેકો મળ્યો છે તે સ્પષ્ટ થશે.

થરાના પરિણામોને લઈને પક્ષો અને ઉમેદવારોમાં ઉત્સુકતા વધી

બીજી તરફ, ઓખા નગરપાલિકાની ચૂંટણીમાં પણ મતદાન પ્રક્રિયા પૂર્ણ થઈ હતી. ઓખામાં સરેરાશ 57 ટકા મતદાન નોંધાયું હતું. મતદારોએ પોતાના મતાધિકારનો ઉપયોગ કરીને ઉમેદવારોના ભાવિનો નિર્ણય કર્યો છે. જ્યારે થરા નગરપાલિકાની ચૂંટણીમાં મતદારોમાં ભારે ઉત્સાહ જોવા મળ્યો હતો. થરામાં સરેરાશ 79 ટકા મતદાન નોંધાતાં ચૂંટણીમાં રેકોર્ડબ્રેક મતદાન થયાની વિગતો સામે આવી છે. અન્ય સ્થળોની સરખામણીએ થરામાં નોંધાયેલા ઊંચા મતદાનથી રાજકીય પક્ષો અને ઉમેદવારોમાં પણ પરિણામોને લઈને ઉત્સુકતા વધી છે.

તમામ લોકોની નજર હવે પરિણામ પર

ત્રણેય સ્થળોએ મતદાન પ્રક્રિયા પૂર્ણ થયા બાદ હવે રાજકીય પક્ષો અને ઉમેદવારો પરિણામોની રાહ જોઈ રહ્યા છે. મતદાનના આંકડા પરથી મતદારોનો ઉત્સાહ જોવા મળ્યો છે, પરંતુ વાસ્તવિક ચિત્ર પરિણામ જાહેર થયા બાદ જ સ્પષ્ટ થશે. હવે 13 ઓક્ટોબરે જાહેર થનારા પરિણામો નક્કી કરશે કે ગાંધીનગર મનપા, ઓખા અને થરામાં મતદારોએ કોના પર વિશ્વાસ મૂક્યો છે અને કયા પક્ષને સત્તા સુધી પહોંચવાની તક મળશે.

આ પણ વાંચો : Mehsanaના મહિલા પોલીસકર્મી સમીક્ષા પટેલે પાવરલિફ્ટિંગમાં વગાડ્યો ડંકો, 2 મહિનાની ટ્રેનિંગમાં જીત્યા 2 ગોલ્ડ મેડલ