Dang માં મેઘમહેર, નદીઓ બે કાંઠે થતા શિવઘાટના ઝરણાં ફરી સક્રિય થયા

Dang : શિવઘાટ વિસ્તારમાં આવેલા નાના ઝરણાં ફરી વહેતા થતાં કુદરતી સૌંદર્ય ખીલી ઊઠ્યું છે અને આહલાદક દ્રશ્યો સર્જાયા છે. ડાંગ જિલ્લામાં વરસાદના કારણે અંબિકા અને ખાપરી નદીમાં ધસમસતો પ્રવાહ જોવા મળી રહ્યો છે. નદીઓમાં પાણીનો પ્રવાહ વધતા તંત્ર દ્વારા નદી કિનારે રહેતા અને ફરવા જતા લોકોને સાવચેતી રાખવા સૂચના આપવામાં આવી છે. પ્રશાસને સ્થાનિકોને નદી કિનારે ન જવા માટે અપીલ કરી છે.

હાલ સમગ્ર ડાંગ જિલ્લામાં ઝરમર વરસાદનો માહોલ યથાવત્ છે. વરસાદના કારણે ડાંગની હરિયાળી વધુ ખીલી ઊઠી છે અને પહાડી વિસ્તારોમાં કુદરતી સૌંદર્યમાં વધારો થયો છે. શિવઘાટ સહિતના વિસ્તારોમાં ફરી સક્રિય બનેલા ઝરણાં પ્રવાસીઓ અને સ્થાનિકો માટે આકર્ષણનું કેન્દ્ર બન્યા છે.

ડાંગ જિલ્લામાં જામ્યો વરસાદી માહોલ

છેલ્લા ચાર કલાક દરમિયાન જિલ્લામાં વિવિધ સ્થળોએ નોંધપાત્ર વરસાદ નોંધાયો છે. આહવામાં 0.79 ઇંચ, સાપુતારામાં 0.39 ઇંચ, વઘઈમાં 0.67 ઇંચ અને સુબીરમાં 0.16 ઇંચ વરસાદ નોંધાયો છે. વરસાદના પગલે નીચાણવાળા વિસ્તારો તેમજ નદી-નાળાઓમાં પાણીનો પ્રવાહ વધવાની શક્યતા હોવાથી તંત્ર દ્વારા લોકોને સાવચેતી રાખવા જણાવાયું છે. ખાસ કરીને નદી અને નાના કોઝવે પાસે જવાનું ટાળવા માટે અપીલ કરવામાં આવી રહી છે.

ડાંગમાં વરસાદના આગમનથી એક તરફ ખેડૂતો અને સ્થાનિકોમાં ખુશીનો માહોલ જોવા મળી રહ્યો છે, તો બીજી તરફ નદીઓમાં વધતા પ્રવાહને લઈને સાવચેતી પણ રાખવામાં આવી રહી છે. પહાડી અને જંગલ વિસ્તાર ધરાવતા ડાંગ જિલ્લામાં ભારે વરસાદ બાદ અચાનક પાણીનો પ્રવાહ વધવાની સંભાવના રહેતી હોવાથી સ્થાનિક પ્રશાસન દ્વારા લોકોને સાવચેત રહેવા સૂચના આપવામાં આવી છે.

ડાંગની પ્રકૃતિ સોળે કળાએ ખીલી

વરસાદથી ડાંગની પ્રકૃતિ જાણે સોળે કળાએ ખીલી ઊઠી હોય તેવા દ્રશ્યો સર્જાયા છે. પહાડો પર છવાયેલા વાદળો, લીલીછમ વનરાજી અને સક્રિય બનેલા ઝરણાંએ સમગ્ર વિસ્તારને મનમોહક બનાવી દીધો છે. હાલ જિલ્લામાં ઝરમર વરસાદ ચાલુ છે અને નદીઓમાં પાણીનો પ્રવાહ પણ જોવા મળી રહ્યો છે. પ્રકૃતિના આ સુંદર નજારાઓ વચ્ચે તંત્રની સલાહનું પાલન કરી નદી કિનારાથી દૂર રહેવું જરૂરી છે.

આ પણ વાંચો : Bhavnagar માં લઠ્ઠાકાંડ બાદ પણ ના સુધર્યા બુટલેગરો ! ફરી દારૂની મીની ફેક્ટરી ઝડપાઈ