Arvalli News : અરવલ્લીમાં પોલીસે કર્યો ગાંજાની ખેતીનો પર્દાફાશ, 169 છોડ સાથે ₹43.12 લાખનો મુદ્દામાલ જપ્ત કર્યો
Arvalli Illegal Cannabis Cultivation
Arvalli News : અરવલ્લીમાં પોલીસે કર્યો ગાંજાની ખેતીનો પર્દાફાશ, 169 છોડ સાથે ₹43.12 લાખનો મુદ્દામાલ જપ્ત કર્યો
Arvalli Illegal Cannabis Cultivation
Arvalli News : શામળાજી પોલીસ સ્ટેશનની હદમાં આવેલા ગલીસેમરો ગામે એન્ટી નાર્કોટિક્સ વિંગ અને સ્પેશિયલ ઑપરેશન ગ્રુપ (SOG)ની સંયુક્ત ટીમે દરોડો પાડીને ગાંજાના લીલા છોડનું કથિત ગેરકાયદે વાવેતર ઝડપી પાડ્યું છે.
પોલીસના જણાવ્યા અનુસાર, સ્થળ પરથી કુલ 169 છોડ મળી આવ્યા હતા, જેનું કુલ વજન 86.250 કિલોગ્રામ અને અંદાજિત કિંમત ₹43,12,500 આંકવામાં આવી છે.
બાતમીના આધારે સંયુક્ત ટીમનો દરોડો
રાજ્યમાં માદક પદાર્થોના ગેરકાયદે વાવેતર અને હેરાફેરી સામે કાર્યવાહી ચાલી રહી છે. આ દરમિયાન અરવલ્લી જિલ્લા પોલીસને મળેલી બાતમીના આધારે એન્ટી નાર્કોટિક્સ વિંગ અને SOGની ટીમે ગલીસેમરો ગામે તપાસ હાથ ધરી હતી. પોલીસની ટીમ સરકારી પંચો, ફોરેન્સિક સાયન્સ લેબોરેટરી (FSL)ના અધિકારી અને વિડિયોગ્રાફરની હાજરીમાં એક ખેતરમાં પહોંચી હતી. પોલીસના જણાવ્યા મુજબ, આ ખેતરમાં મકાઈ અને જુવારનું વાવેતર કરવામાં આવ્યું હતું. તપાસ દરમિયાન ત્યાં ગાંજાના લીલા છોડ મળી આવ્યા હતા.
પોલીસે સ્થળ પરથી ગાંજાના કુલ 169 છોડ કબજે કર્યા હતા. છોડનું કુલ વજન 86.250 કિલોગ્રામ નોંધવામાં આવ્યું છે, જ્યારે તેની અંદાજિત કિંમત ₹43 લાખથી વધુ હોવાનું જણાવાયું છે. FSL અધિકારીની પ્રાથમિક તપાસમાં છોડ ગાંજાના હોવાનું જણાયું હોવાનું પોલીસ દ્વારા જણાવવામાં આવ્યું છે. આ કાર્યવાહી દરમિયાન મળી આવેલા છોડને મુદ્દામાલ તરીકે કબજે કરવામાં આવ્યા છે. જપ્ત કરાયેલા છોડની ઓળખ, વજન અને અન્ય વિગતો અંગેની અંતિમ માહિતી તપાસના આધારે સ્પષ્ટ થશે.
એક વ્યક્તિ સામે NDPS એક્ટ હેઠળ ગુનો
આ કેસમાં ગલીસેમરો ગામના ડામોર ફળિયામાં રહેતા 36 વર્ષીય અનિલભાઈ મરતાભાઈ ડામોર સામે શામળાજી પોલીસ સ્ટેશનમાં NDPS એક્ટની કલમ 8(C), 20(A)(1) અને 20(B)(2)(C) હેઠળ ગુનો નોંધવામાં આવ્યો હોવાનું જણાવાયું છે.
હાલ પોલીસ દ્વારા આ મામલે આગળની કાયદેસરની કાર્યવાહી હાથ ધરવામાં આવી છે. ખેતરમાં ગાંજાના છોડ કયા સંજોગોમાં ઉગાડવામાં આવ્યા હતા અને આ મામલે અન્ય કોઈ કડી સામે આવે છે કે નહીં, તે તપાસનો વિષય છે. અરવલ્લી જિલ્લામાં ગેરકાયદે માદક પદાર્થોના વાવેતર સામે થયેલી આ કાર્યવાહી ચર્ચાનો વિષય બની છે. હવે પોલીસ તપાસમાં આગળ શું વિગતો બહાર આવે છે તેના પર સૌની નજર છે.
Vivek Shah
વિવેક શાહ ગ્રોથ નાઉ ન્યૂઝમાં Senior Assignment Editor તરીકે કામ કરે છે. ક્રાઇમ હોય કે ઘટના, મૂળમાં ઉતરીને રિપોર્ટિંગ કરવાની આદતે તેમણે અલગ ઓળખ બનાવી છે.. તેમના દ્વારા લખાતી પોલીસ પંચાત સ્પેશયલ કોલમ ખાસ વંચાય છે.. 11 વર્ષનો બોહળો અનુભવ તેમણે મોટા નેટવર્કની વિવિધ ચેનલ્સ સાથે કામ કરીને કેળવ્યો છે
