મુલ્લાંપુરના મહારાજા યાદવેન્દ્ર સિંહ આંતરરાષ્ટ્રીય ક્રિકેટ સ્ટેડિયમમાં ભારત અને અફઘાનિસ્તાન વચ્ચે એકમાત્ર ટેસ્ટ મેચની શરૂઆત શનિવારથી થઈ છે. આ મેચમાં ભારતીય ટીમે ટોસ જીતીને પ્રથમ બેટિંગ કરવાનો નિર્ણય લીધો છે.

ભારતીય ટીમના નવા કેપ્ટન શુભમન ગિલે ટોસ જીત્યા બાદ કહ્યું કે પિચ ધીમે ધીમે ધીમી અને નીચી બનવાની શક્યતા છે, તેમજ ગરમી અને ભેજને ધ્યાનમાં રાખીને પહેલા બેટિંગ કરવું યોગ્ય રહેશે. તેમણે આ પણ જણાવ્યું કે આ મેદાન પર રમવું તેમના માટે ખાસ છે, કારણ કે તેઓ અહીં રમતા-રમતા મોટા થયા છે. ગિલે ટીમ કોમ્બિનેશનને મહત્વ આપતાં જણાવ્યું કે આગામી સમયમાં ભારતને ઘણા ટેસ્ટ મેચ રમવાના છે, તેથી યોગ્ય સંતુલન બનાવવું જરૂરી છે. આ મેચમાં માનવ સુથારને ટેસ્ટ ડેબ્યૂ કરવાની તક આપવામાં આવી છે.

અફઘાનિસ્તાનના કેપ્ટન હશમતુલ્લાહ શાહિદીએ ટોસ હાર્યા બાદ કહ્યું કે તેઓ પણ પહેલા બેટિંગ કરવા માંગતા હતા, કારણ કે વિકેટ સારી લાગી રહી હતી. તેમણે જણાવ્યું કે તેમની ટીમ સારી તૈયારી સાથે મેદાનમાં ઉતરી છે અને ચેલેન્જ માટે સંપૂર્ણ રીતે તૈયાર છે. અફઘાનિસ્તાને આ મેચમાં ત્રણ ફાસ્ટ બોલર અને બે સ્પિનર સાથે મેદાનમાં ઉતરવાનો નિર્ણય કર્યો છે. આ મેચમાં નાંગેયાલિયા ખરોટે ડેબ્યૂ કર્યું છે.

ભારતની આ મેચ ખાસ મહત્વ ધરાવે છે કારણ કે છેલ્લા ઘરઆંગણે દક્ષિણ આફ્રિકા સામે 0-2ની હાર બાદ ટીમ નવા આત્મવિશ્વાસ સાથે મેદાનમાં ઉતરી છે. શુભમન ગિલની આગેવાનીમાં ટીમ ઈન્ડિયા મજબૂત પ્રદર્શન કરવા ઈચ્છે છે. સાઈ સુદર્શન માટે પણ આ ટેસ્ટ પોતાની ક્ષમતા સાબિત કરવાની મોટી તક છે.

ભારતની પ્લેઇંગ ઇલેવનમાં કે.એલ. રાહુલ, યશસ્વી જયસ્વાલ, સાઈ સુદર્શન, શુભમન ગિલ (કેપ્ટન), ઋષભ પંત (વિકેટકીપર), ધ્રુવ જુરેલ, વોશિંગ્ટન સુંદર, માનવ સુથાર, કુલદીપ યાદવ, મોહમ્મદ સિરાજ અને પ્રસિદ્ધ કૃષ્ણાનો સમાવેશ થાય છે.

અફઘાનિસ્તાનની પ્લેઇંગ ઇલેવનમાં સેદીકુલ્લાહ અતલ, રહમાનુલ્લાહ ગુરબાઝ, અબ્દુલ મલિક, રહમત શાહ, હશમતુલ્લાહ શાહિદી (કેપ્ટન), અફસર જજઈ (વિકેટકીપર), અઝમતુલ્લાહ ઉમરઝાઈ, શરાફુદ્દીન અશરફ, નાંગેયાલિયા ખરોટે, જિયાઉર રહમાન શરીફી અને મોહમ્મદ સલીમ સફીનો સમાવેશ થાય છે.