ન્યૂ જર્સી ન્યૂ જર્સીમાં રમાયેલી ફીફા વર્લ્ડ કપ 2026ની ગ્રુપ-એલ મેચમાં ઇંગ્લેન્ડે પનામાને 2-0થી હરાવીને શાનદાર જીત નોંધાવી હતી. આ જીતમાં કેપ્ટન હેરી કેને એક મહત્વપૂર્ણ ગોલ નોંધાવ્યો હતો.

આ ગોલ સાથે હેરી કેન હવે ફીફા વર્લ્ડ કપના ઇતિહાસમાં ઇંગ્લેન્ડ તરફથી સૌથી વધુ ગોલ કરનાર ખેલાડી બની ગયો છે. કેને વર્લ્ડ કપમાં પોતાનો 11મો ગોલ નોંધાવીને ગેરી લિનેકરના 10 ગોલના રેકોર્ડને પાછળ છોડી દીધો છે.

હેરી કેન વર્લ્ડ કપ 2026ની શરૂઆત પહેલાં લિનેકરથી બે ગોલ પાછળ હતો. જોકે ટૂર્નામેન્ટ દરમિયાન સતત ગોલ કરીને તેણે પહેલા લિનેકરની બરાબરી કરી અને હવે નવો ઇતિહાસ રચ્યો છે.

કેને 2018ના રશિયા વર્લ્ડ કપમાં પ્રથમ વખત રમતાં જ છ ગોલ ફટકારી ગોલ્ડન બૂટ જીત્યો હતો. ત્યારબાદ 2022ના કતાર વર્લ્ડ કપમાં વધુ બે ગોલ નોંધાવ્યા હતા. હવે 2026ના વર્લ્ડ કપમાં પણ તેની શાનદાર ફોર્મ ચાલુ રહી છે.

પનામા સામેની મેચ હેરી કેનની ઇંગ્લેન્ડ માટેની 117મી આંતરરાષ્ટ્રીય મેચ હતી. આ ગોલ સાથે તેના કુલ આંતરરાષ્ટ્રીય ગોલની સંખ્યા 82 પર પહોંચી ગઈ છે. તે પહેલેથી જ ઇંગ્લેન્ડની પુરુષ સિનિયર ટીમ માટે સૌથી વધુ ગોલ કરનાર ખેલાડી છે અને હવે પોતાના જ રેકોર્ડને વધુ મજબૂત બનાવી રહ્યો છે.