ભુજની ખાનગી હોસ્પિટલમાં AC બ્લાસ્ટથી આગ, દર્દીઓ અને સ્ટાફમાં અફરાતફરી
ભુજની ખાનગી હોસ્પિટલમાં AC બ્લાસ્ટથી આગ, દર્દીઓ અને સ્ટાફમાં અફરાતફરી
ભુજ: ભુજમાં આજે સવારે એક ખાનગી હોસ્પિટલમાં એર કન્ડિશનર (AC)માં અચાનક બ્લાસ્ટ થતાં આગ લાગી હતી. ઘટનાના પગલે હોસ્પિટલમાં હાજર દર્દીઓ, તેમના સગાં અને સ્ટાફમાં અફરાતફરી મચી ગઈ હતી. ઘટનાની જાણ થતાં જ ફાયર બ્રિગેડની ટીમ તાત્કાલિક ઘટનાસ્થળે પહોંચી હતી અને આગ પર કાબૂ મેળવી લીધો હતો. સદનસીબે આ ઘટનામાં કોઈ જાનહાનિ થઈ નથી.
પ્રાથમિક માહિતી મુજબ હોસ્પિટલના ACમાં અચાનક બ્લાસ્ટ થતાં આગ ફાટી નીકળી હતી. આગને કારણે હોસ્પિટલમાં રાખવામાં આવેલા ફર્નિચર, મેડિકલ સાધનો તથા અન્ય સામાનને નુકસાન થયું હોવાનું જાણવા મળ્યું છે. આગના ધુમાડાને કારણે થોડા સમય માટે હોસ્પિટલમાં ગભરાટનો માહોલ સર્જાયો હતો.
ફાયર વિભાગે સમયસર કામગીરી હાથ ધરતાં આગ વધુ ફેલાતી અટકાવી હતી. આગ પર સંપૂર્ણ કાબૂ મેળવ્યા બાદ પરિસ્થિતિ સામાન્ય બની હતી. પ્રાથમિક અંદાજ મુજબ આગના કારણે લાખો રૂપિયાનું નુકસાન થયું હોવાનું સામે આવ્યું છે.
આગ લાગવાનું ચોક્કસ કારણ હજુ સુધી જાણી શકાયું નથી. ફાયર વિભાગ અને સંબંધિત તંત્રે ઘટનાની તપાસ શરૂ કરી છે.
