ભારે વરસાદથી સુમનદીપ યુનિવર્સિટીની હોસ્ટેલમાં પાણી ભરાયા, 150 લોકોને સલામત સ્થળે ખસેડાયા

વડોદરા જિલ્લાના વાઘોડિયા તાલુકામાં આવેલી સુમનદીપ વિદ્યાપીઠની લક્ષ્મી હોસ્ટેલમાં ભારે વરસાદના કારણે પાણી ભરાઈ જતાં મધ્યરાત્રિએ બચાવ કામગીરી હાથ ધરવામાં આવી હતી. વરસાદના કારણે હોસ્ટેલ પરિસરમાં પાણીનું સ્તર ઝડપથી વધતાં વિદ્યાર્થીઓ અને અન્ય રહેવાસીઓની સુરક્ષાને ધ્યાનમાં રાખીને તંત્રે તાત્કાલિક કાર્યવાહી કરી હતી.

માહિતી અનુસાર, રાત્રે અંદાજે 3 વાગ્યે વાઘોડિયા મામલતદાર, સ્થાનિક પોલીસ તેમજ વહીવટી તંત્રની ટીમ ઘટનાસ્થળે પહોંચી હતી. પરિસ્થિતિની ગંભીરતાને ધ્યાનમાં રાખીને સંયુક્ત બચાવ અભિયાન શરૂ કરવામાં આવ્યું હતું. બચાવ કામગીરી દરમિયાન કુલ 150 લોકોને સુરક્ષિત સ્થળે ખસેડવામાં આવ્યા હતા.

ખસેડાયેલા લોકોમાં 100 છાત્રાઓ, 40 છાત્રો તેમજ 10 શ્રમિકોનો સમાવેશ થાય છે. તંત્રની સમયસરની કામગીરી અને સંકલનના કારણે કોઈ જાનહાનિ કે ગંભીર ઇજા થઈ નથી. તમામ લોકોને સલામત સ્થળે પહોંચાડીને જરૂરી સુવિધાઓ ઉપલબ્ધ કરાવવામાં આવી છે.

ભારે વરસાદને કારણે નીચાણવાળા વિસ્તારોમાં પાણી ભરાવાની સ્થિતિ સર્જાતા સ્થાનિક તંત્ર સતત પરિસ્થિતિ પર નજર રાખી રહ્યું છે. હવામાન વિભાગ દ્વારા વરસાદની આગાહી વચ્ચે જિલ્લા વહીવટીતંત્રને પણ એલર્ટ મોડ પર રાખવામાં આવ્યું છે. જરૂરી હોય ત્યાં વધુ બચાવ અને રાહત કામગીરી માટે ટીમોને તૈયાર રાખવામાં આવી છે.

વહીવટી તંત્રે નાગરિકોને અનાવશ્યક બહાર ન નીકળવા, પાણી ભરાયેલા વિસ્તારોમાં જવાનું ટાળવા અને માત્ર અધિકૃત સૂચનાઓનું પાલન કરવાની અપીલ કરી છે. હાલમાં સુમનદીપ વિદ્યાપીઠ કેમ્પસની સ્થિતિ પર સતત નજર રાખવામાં આવી રહી છે અને પરિસ્થિતિ સામાન્ય બનાવવા માટે જરૂરી પગલાં લેવામાં આવી રહ્યા છે.