તેહરાન : અમેરિકાના રાષ્ટ્રપતિ ડોનાલ્ડ ટ્રમ્પની હત્યા માટે 50 મિલિયન યુરોના ઇનામનો પ્રસ્તાવ, ઇરાની સંસદમાં બિલ લાવવાની તૈયારી  Iranની મીડિયા રિપોર્ટમાં અમેરિકાના રાષ્ટ્રપતિ Donald Trumpને લઈને ચોંકાવનારો દાવો કરવામાં આવ્યો છે. રિપોર્ટ મુજબ ઇરાની સરકાર ટ્રમ્પની હત્યા કરનારને 50 મિલિયન યુરોનું ઇનામ આપવાનો પ્રસ્તાવ સંસદમાં લાવવાની તૈયારી કરી રહી છે.

‘ઇરાન વાયર’ના અહેવાલ અનુસાર, ઇરાની સંસદની નેશનલ સિક્યુરિટી અને ફોરેન પોલિસી કમિટીના ચેરમેન Ebrahim Aziziએ જણાવ્યું કે ઇસ્લામિક રિપબ્લિકની સૈન્ય અને સુરક્ષા એજન્સીઓ દ્વારા “કાઉન્ટર-એક્શન” નામની યોજના તૈયાર કરવામાં આવી રહી છે. આ પ્રસ્તાવમાં ડોનાલ્ડ ટ્રમ્પની હત્યા કરનારને 50 મિલિયન યુરો ઇનામ આપવાની જોગવાઈનો સમાવેશ કરવામાં આવ્યો છે.

અજીજીએ જણાવ્યું કે ટ્રમ્પ ઉપરાંત ઇઝરાયલના વડાપ્રધાન Benjamin Netanyahu અને યુએસ સેન્ટ્રલ કમાન્ડ (CENTCOM)ના કમાન્ડરને પણ નિશાન બનાવવાની વાત કરવામાં આવી છે. તેમણે દાવો કર્યો કે ઇરાનના સુપ્રીમ લીડર Ali Khamenei વિરુદ્ધ થયેલા કથિત ષડયંત્રમાં તેમની ભૂમિકા હોવાના કારણે આ પગલાં જરૂરી ગણાયા છે.

સરકાર સમર્થક મીડિયા આઉટલેટ “મસાફ”એ અગાઉ દાવો કર્યો હતો કે “કિલ ટ્રમ્પ” નામના અભિયાન માટે 50 મિલિયન ડોલરના નાણાકીય સ્રોત એકત્રિત કરવામાં આવ્યા છે.

રિપોર્ટ મુજબ “હંડાલા” નામના હેકિંગ ગ્રુપે પણ નિવેદન આપીને દાવો કર્યો હતો કે ટ્રમ્પ અને નેતન્યાહૂને નિશાન બનાવવા માટે 50 મિલિયન ડોલર ફાળવવામાં આવ્યા છે. ગ્રુપે જણાવ્યું હતું કે આ રકમ વાસ્તવિક કાર્યવાહી કરનાર વ્યક્તિ અથવા સંગઠનને આપવામાં આવશે.

ઇરાન ઇન્ટરનેશનલ મીડિયા અનુસાર, અજીજીએ સરકારી ટેલિવિઝનને જણાવ્યું કે માર્ચમાં યુદ્ધ શરૂ થયા બાદ અનેક બિલ તૈયાર કરવામાં આવ્યા છે, જેમાં સૈન્ય અને સુરક્ષા દળોની જવાબી કાર્યવાહી સંબંધિત પ્રસ્તાવ પણ સામેલ છે.

અજીજીએ વધુમાં કહ્યું કે “અમેરિકાના રાષ્ટ્રપતિ, ઇઝરાયલના વડાપ્રધાન અને સેન્ટકોમ કમાન્ડરને નિશાન બનાવવું જોઈએ અને તેમની સામે જવાબી કાર્યવાહી થવી જોઈએ. આ અમારો અધિકાર છે.”

ઉલ્લેખનીય છે કે માર્ચ મહિનાની શરૂઆતમાં ઇરાનમાં મોબાઇલ યુઝર્સને મોકલાયેલા મોટા પ્રમાણના મેસેજમાં પણ “ટ્રમ્પની હત્યા માટે ઇનામ” સંબંધિત આંતરરાષ્ટ્રીય અભિયાનનો પ્રચાર કરવામાં આવ્યો હોવાનો દાવો કરવામાં આવ્યો હતો.