અમદાવાદ:  આજે ફરી એકવાર પેટ્રોલ અને ડીઝલના ભાવમાં વધારો નોંધાતા સામાન્ય અને મધ્યવર્ગીય પરિવારોના બજેટ પર સીધી અસર પડી છે. આજે પેટ્રોલના ભાવમાં પ્રતિ લિટર રૂ. 2.61 અને ડીઝલમાં રૂ. 2.71નો વધારો કરવામાં આવ્યો છે. છેલ્લા એક મહિનામાં આ ચોથી વખત ભાવવધારો નોંધાયો છે.

નવી કિંમતો મુજબ અમદાવાદમાં પેટ્રોલનો ભાવ હવે રૂ. 101.81 પ્રતિ લિટર જ્યારે ડીઝલનો ભાવ રૂ. 97.93 પ્રતિ લિટર સુધી પહોંચી ગયો છે. સતત વધી રહેલા ઇંધણના ભાવોના કારણે વાહનચાલકોમાં ભારે નારાજગી જોવા મળી રહી છે.

છેલ્લા 11 દિવસના આંકડાઓ પર નજર કરીએ તો પેટ્રોલ અને ડીઝલના ભાવમાં કુલ મળીને અંદાજે રૂ. 7.50નો વધારો નોંધાયો છે. આ પહેલા 23 મેના રોજ પણ પેટ્રોલમાં 87 પૈસા અને ડીઝલમાં 91 પૈસાનો વધારો કરવામાં આવ્યો હતો.

વારંવારના ભાવવધારાથી ઘરખર્ચ, ટ્રાન્સપોર્ટેશન અને દૈનિક જીવન સાથે જોડાયેલા ખર્ચમાં વધારો થતાં મધ્યવર્ગ માટે આર્થિક સંકટ વધુ ગંભીર બનતું જાય છે. ખાસ કરીને રોજિંદા વાહન વાપરતા લોકો માટે આ વધતા ભાવો મોટું બોજ સાબિત થઈ રહ્યા છે.