નવી દિલ્હી,:  ક્લિકઅપના સીઇઓએ સ્પષ્ટ કર્યું છે કે આ નિર્ણય કંપનીની મજબૂત સ્થિતિને ધ્યાનમાં રાખીને લેવામાં આવ્યો છે. આ છટણીથી થનારી મોટાભાગની બચતનો ઉપયોગ બાકીના સ્ટાફ અને AI ની મદદથી શાનદાર પ્રદર્શન કરનારા કર્મચારીઓને વધુ પગાર આપવા માટે કરવામાં આવશે.

પ્રોડક્ટિવિટીની રીત બદલાઈ રહી છે: સીઇઓ જેબ ઇવાન્સ
સોફ્ટવેર ફર્મના સ્થાપક અને સીઇઓ જેબ ઇવાન્સે સોશિયલ મીડિયા પ્લેટફોર્મ ‘X’ પર એક પોસ્ટમાં જણાવ્યું હતું કે, "આજે અમે કર્મચારીઓની સંખ્યામાં ૨૨ ટકાનો ઘટાડો કર્યો છે. કંપની અત્યાર સુધીની સૌથી મજબૂત સ્થિતિમાં છે. આ નિર્ણય મેં લીધો છે અને તેની સંપૂર્ણ જવાબદારી પણ મારી છે. મેં આ પગલું એટલા માટે ઉઠાવ્યું છે કારણ કે સૌથી ઉચ્ચ સ્તરની પ્રોડક્ટિવિટી (ઉત્પાદકતા) સાથે કામ કરવાની રીત હવે બદલાઈ રહી છે."

ઇવાન્સે ઉમેર્યું હતું કે, જે કર્મચારીઓને કંપનીમાંથી મુક્ત કરવામાં આવ્યા છે, તેમને તેમના યોગદાનનું સન્માન કરતું અને આ મુશ્કેલ સમયમાં મદદરૂપ બને તેવું આર્થિક પેકેજ આપવામાં આવશે. બીજી તરફ, કંપની એવા કર્મચારીઓ માટે વાર્ષિક ૧૦ લાખ ડોલર (અંદાજે ૮.૩ કરોડ રૂપિયા) સુધીના સેલેરી બેન્ડ શરૂ કરશે જેઓ '૧૦૦ ગણો પ્રભાવ' પાડી શકે તેવું પ્રદર્શન કરશે.

નવું ઓપરેટિંગ મોડલ: એન્જિનિયર્સ હવે AI ના ‘મેનેજર’ બનશે
સીઇઓએ કંપનીના નવા ઓપરેટિંગ મોડલની રૂપરેખા આપતા જણાવ્યું કે, હવે કંપનીના સૌથી શ્રેષ્ઠ એન્જિનિયર્સ અને પ્રોડક્ટ લીડર્સ માત્ર કોડ લખવાનું કામ નહીં કરે, પરંતુ તેઓ AI એજન્ટ્સનું સંચાલન અને તેની સમીક્ષા કરશે, જેનાથી તેમની કાર્યક્ષમતા અનેક ગણી વધી જશે.

તેમણે કહ્યું, "સામાન્ય માન્યતા એવી છે કે AI દરેક વ્યક્તિને વધુ પ્રોડક્ટિવ બનાવે છે, પરંતુ વાસ્તવમાં એવું નથી. જો આજના પરંપરાગત વર્કફ્લોને બદલ્યા વિના જ ચલાવવામાં આવે, તો તે AI સિસ્ટમની પ્રગતિમાં અવરોધ ઊભો કરશે." જો કંપનીના ટોચના એન્જિનિયર્સ પોતાનો સમય અન્ય સ્ટાફના કોડની સમીક્ષા કરવામાં વેડફશે, તો તે બિનઅસરકારક સાબિત થશે. આ એન્જિનિયર્સ ઇન્સાનના કોડની સરખામણીએ AI એજન્ટ્સ દ્વારા તૈયાર કરાયેલા કોડની સમીક્ષા ખૂબ જ ઝડપથી કરી શકે છે.

સીઇઓએ એક રસપ્રદ વાત કહેતા જણાવ્યું કે, "જે લોકો AI ની મદદથી પોતાની વર્તમાન નોકરીને ઓટોમેટ (સ્વયંસંચાલિત) કરી લે છે, તેમની પાસે હંમેશા કામ રહેશે. તેઓ ભવિષ્યમાં AI સિસ્ટમના માલિક એટલે કે 'એજન્ટ મેનેજર' બની જશે."

ટેક જગતમાં છટણીનો દોર યથાવત
નોંધનીય છે કે આ અઠવાડિયે ફેસબુકની પેરન્ટ કંપની ‘મેટા’ (Meta) એ પણ પોતાની આર્ટિફિશિયલ ઇન્ટેલિજન્સ (AI) પહેલને મજબૂત કરવા માટે તેના વૈશ્વિક કર્મચારીઓમાંથી ૧૦ ટકા હિસ્સો ઘટાડવાની શરૂઆત કરી છે.

વિવિધ રિપોર્ટ્સ અનુસાર, ૨૦૨૬માં વૈશ્વિક ટેક સેક્ટરમાં છટણી ખૂબ જ ઝડપથી વધી રહી છે. આ વર્ષે અત્યાર સુધીમાં ૧ લાખથી વધુ લોકો પોતાની નોકરી ગુમાવી ચૂક્યા છે અને કુલ છટણીનો આંકડો ૩ લાખથી વધુ થવાની આશંકા છે. આ યાદીમાં ઓરેકલ, એમેઝોન અને મેટા જેવી દિગ્ગજ ટેક કંપનીઓ સામેલ છે.