નવી દિલ્હી: IPL 2026માં રોયલ ચેલેન્જર્સ બેંગલુરુ (RCB) ચેમ્પિયન બની હતી, પરંતુ આ સિઝનની સૌથી મોટી શોધ અને સૌથી મોટો સ્ટાર રાજસ્થાન રોયલ્સનો યુવા બેટ્સમેન વૈભવ સૂર્યવંશી રહ્યો. માત્ર 15 વર્ષની ઉંમરે વૈભવે જે પ્રદર્શન કર્યું તે IPLના ઈતિહાસમાં લાંબા સમય સુધી યાદ રહેશે.

સીઝનની શરૂઆત પહેલા જ તમામની નજર વૈભવ પર હતી, પરંતુ તેણે પોતાની આક્રમક અને પરિપક્વ બેટિંગથી સાબિત કરી દીધું કે તેની સફળતા કોઈ સંયોગ નહોતી. રાજસ્થાન રોયલ્સ તરફથી રમતા વૈભવે 16 મેચમાં 237ના શાનદાર સ્ટ્રાઈક રેટ સાથે 776 રન ફટકાર્યા હતા. આ દરમિયાન તેણે 1 સદી અને 5 અર્ધસદી નોંધાવી હતી.

વૈભવની બેટિંગમાં આ સિઝનમાં ગજબની પરિપક્વતા જોવા મળી હતી. તેણે માત્ર મોટા શોટ્સ પર જ નિર્ભર રહેવાને બદલે પરિસ્થિતિ પ્રમાણે જવાબદારીપૂર્વક બેટિંગ કરી હતી. ગુજરાત ટાઇટન્સ સામેના બીજા ક્વોલિફાયરમાં તેની 47 બોલમાં 96 રનની યાદગાર ઇનિંગ્સે રાજસ્થાનને જીતની નજીક પહોંચાડ્યું હતું.

કાગિસો રબાડા, મોહમ્મદ સિરાજ અને જસપ્રિત બુમરાહ જેવા વિશ્વસ્તરીય બોલરો સામે પણ વૈભવે નિર્ભયતાથી બેટિંગ કરી હતી. બુમરાહની પ્રથમ જ બોલ પર ફટકારેલો છગ્ગો સમગ્ર સિઝનની સૌથી ચર્ચિત ક્ષણોમાં સામેલ રહ્યો હતો.

વૈભવે IPL 2026માં કુલ પાંચ મોટા એવોર્ડ જીત્યા હતા. જેમાં ઓરેન્જ કેપ, મોસ્ટ વેલ્યુએબલ પ્લેયર, એમર્જિંગ પ્લેયર ઓફ ધ સિઝન, સુપર સ્ટ્રાઈકર ઓફ ધ સિઝન અને સુપર સિક્સેસ ઓફ ધ સિઝનનો સમાવેશ થાય છે.

આ સિઝનમાં વૈભવે કુલ 72 છગ્ગા ફટકાર્યા હતા, જે IPLના એક જ સિઝનમાં કોઈ પણ બેટ્સમેન દ્વારા ફટકારવામાં આવેલા સૌથી વધુ છગ્ગાનો નવો રેકોર્ડ છે. ઉપરાંત, તે IPLમાં સૌથી ઓછી બોલમાં 1000 રન પૂર્ણ કરનાર બેટ્સમેન પણ બન્યો હતો.

પાવરપ્લેમાં સૌથી વધુ રન બનાવવાનો રેકોર્ડ પણ વૈભવે પોતાના નામે કર્યો હતો, જેમાં તેણે ડેવિડ વોર્નરનો વર્ષો જૂનો રેકોર્ડ તોડી નાખ્યો હતો. એલિમિનેટર મુકાબલામાં સનરાઇઝર્સ હૈદરાબાદ સામે તેણે એક જ ઇનિંગમાં 12 છગ્ગા ફટકારીને નવો ઇતિહાસ રચ્યો હતો.

વૈભવે માત્ર 16 બોલમાં અર્ધશતક ફટકારી IPL પ્લેઓફમાં સંયુક્ત રીતે સૌથી ઝડપી ફિફ્ટીનો રેકોર્ડ પણ પોતાના નામે કર્યો હતો. આ ઉપરાંત, તે IPLના એક સિઝનમાં સૌથી વધુ રન બનાવનાર અનકેપ્ડ ખેલાડી પણ બન્યો હતો.

માત્ર 15 વર્ષની ઉંમરે વૈભવ સૂર્યવંશીએ જે રીતે IPLના મંચ પર પોતાનો દબદબો સ્થાપિત કર્યો છે, તે જોતા ક્રિકેટ નિષ્ણાતો તેને ભારતીય ક્રિકેટનું આગામી સુપરસ્ટાર ગણાવી રહ્યા છે.