વડોદરામાં મુહર્રમના પર્વ દરમિયાન દર વર્ષે હકીમવાડાના તાજિયા સાથે જોડાયેલી એક અનોખી પરંપરા નિભાવવામાં આવે છે. નાગરવાડા વિસ્તારમાં સ્થાપિત આ તાજિયાને બહુચરાજી માતાના મંદિરના મહંત દ્વારા પવિત્ર જળ, ગુલાબની પાંખડીઓ અને અત્તરથી 'ઠંડા' આપવામાં આવે છે.

વિધિ પૂર્ણ થયા બાદ તાજિયાને શ્રીફળનો ભોગ અર્પણ કરવામાં આવે છે અને ત્યારબાદ સરસિયા તળાવ તરફ પરંપરાગત રીતે લઈ જવામાં આવે છે. આ સમગ્ર ધાર્મિક વિધિ દરમિયાન બંને સમાજના લોકો મોટી સંખ્યામાં હાજર રહી ભાઈચારા અને પરસ્પર સન્માનનો સંદેશ આપે છે.

મહારાજા સયાજીરાવ ગાયકવાડ ત્રીજાના સમયથી શરૂ થયેલી આ પરંપરા આજે પણ અવિરત રીતે જળવાઈ રહી છે. વર્ષો વીતી ગયા છતાં આ પરંપરામાં કોઈ વિક્ષેપ આવ્યો નથી, જે વડોદરાની ગંગા-જમુની સંસ્કૃતિનું ઉત્તમ ઉદાહરણ માનવામાં આવે છે.

આ અનોખી પરંપરા માત્ર ધાર્મિક વિધિ પૂરતી સીમિત નથી, પરંતુ હિંદુ-મુસ્લિમ સમાજ વચ્ચેના પ્રેમ, વિશ્વાસ અને કોમી એકતાનો મજબૂત સંદેશ પણ આપે છે. સમગ્ર દેશ માટે વડોદરાની આ પરંપરા સામાજિક સૌહાર્દ અને એકતાનું પ્રેરણાદાયી પ્રતીક બની રહી છે.