PDEU SEQUENCE 2026: પંડિત દીનદયાળ એનર્જી યુનિવર્સિટી (PDEU), ગાંધીનગર ખાતે અદ્યતન ટેકનોલોજી, સેમિકન્ડક્ટર, ક્વોન્ટમ કમ્પ્યુટિંગ, રિન્યુએબલ એનર્જી અને ક્લાઇમેટ એક્શન જેવા મહત્વપૂર્ણ વિષયો પર ‘Summit of the Future: SEQUENCE 2026’નું આયોજન કરવામાં આવ્યું હતું. સમિટમાં ગુજરાતને ભવિષ્યની ટેકનોલોજી અને સેમિકન્ડક્ટર ક્ષેત્રે વધુ મજબૂત હબ બનાવવાના પ્રયાસો પર ચર્ચા કરવામાં આવી હતી.

નવી પેઢી ટેકનોલોજીની વપરાશકર્તા નહીં, સર્જક બની રહી છે

સમિટમાં વિજ્ઞાન અને ટેકનોલોજી તેમજ વન, પર્યાવરણ અને ક્લાઇમેટ ચેન્જ મંત્રી અર્જુન મોઢવાડિયાએ યુવાનોને સંબોધતા જણાવ્યું હતું કે આજની નવી પેઢી માત્ર ટેકનોલોજીનો ઉપયોગ કરતી નથી, પરંતુ સંશોધન, નવીનતા અને ઉદ્યોગસાહસિકતાના ક્ષેત્રે પણ આગળ વધી રહી છે. તેમણે જણાવ્યું કે ગુજરાતે પરંપરાગત ઉદ્યોગો બાદ હવે સેમિકન્ડક્ટર, ક્વોન્ટમ ટેકનોલોજી, સ્પેસ અને અન્ય સનરાઇઝ સેક્ટર્સમાં પોતાની નવી ઓળખ ઊભી કરી છે.

ગુજરાતમાં 6 સેમિકન્ડક્ટર પ્લાન્ટ્સ

મંત્રીના જણાવ્યા અનુસાર, ઇન્ડિયા સેમિકન્ડક્ટર મિશન હેઠળ દેશ માટે મંજૂર થયેલા પ્રોજેક્ટ્સમાં ગુજરાતમાં અનેક મોટા પ્રોજેક્ટ્સ આકાર લઈ રહ્યા છે. Kaynes Semicon અને CG Semi સહિતના પ્રોજેક્ટ્સ દ્વારા રાજ્યમાં સેમિકન્ડક્ટર ઉત્પાદન માટેનું ઇકોસિસ્ટમ વિકસાવવામાં આવી રહ્યું છે. આ સાથે સેમિકન્ડક્ટર ઉદ્યોગ માટે જરૂરી કેમિકલ્સ, ગેસ અને ઇલેક્ટ્રોનિક સાધનો સહિતની સપ્લાય ચેઇનને પણ રાજ્યમાં વિકસાવવાની દિશામાં કામગીરી ચાલી રહી છે.

ગુજરાતમાં સ્પેસ સેક્ટરને પણ વેગ

સમિટ દરમિયાન ગુજરાતના સ્પેસ સેક્ટરમાં થઈ રહેલા વિકાસની પણ ચર્ચા કરવામાં આવી હતી. મંત્રી અર્જુન મોઢવાડિયાએ જણાવ્યું કે દેશમાં સ્પેસ સ્ટાર્ટઅપ્સની સંખ્યા સતત વધી રહી છે. સાણંદ નજીક ગુજરાત સ્પેસ પાર્ક વિકસાવવામાં આવી રહ્યો છે. અહીં Azista Space દ્વારા નાના ઉપગ્રહોના ઉત્પાદન માટે આધુનિક સુવિધા ઊભી કરવાની કામગીરી શરૂ કરવામાં આવી હોવાનું પણ જણાવાયું હતું.

ક્વોન્ટમ કમ્પ્યુટિંગ માટે સેન્ટર ઓફ એક્સેલન્સનું લોન્ચિંગ

SEQUENCE 2026 દરમિયાન PDEU ખાતે ‘સેન્ટર ઓફ એક્સેલન્સ - ક્વોન્ટમ કમ્પ્યુટિંગ’નું વિધિવત લોન્ચિંગ કરવામાં આવ્યું હતું. ક્વોન્ટમ કમ્પ્યુટિંગ ક્ષેત્રે સંશોધન, તાલીમ અને નવી ટેકનોલોજીના વિકાસ માટે આ કેન્દ્ર મહત્વપૂર્ણ બની શકે છે. કાર્યક્રમમાં QpiAIના સ્થાપક અને CEO ડૉ. નાગેન્દ્ર નાગરાજાએ ક્વોન્ટમ કમ્પ્યુટિંગના ભવિષ્ય અંગે માર્ગદર્શન આપ્યું હતું.

PDEU અને વિવિધ સંસ્થાઓ વચ્ચે MoU

સમિટ દરમિયાન શિક્ષણ અને ઉદ્યોગ ક્ષેત્ર વચ્ચે સહયોગ વધારવા માટે PDEU દ્વારા અનેક સંસ્થાઓ અને કંપનીઓ સાથે MoUનું આદાન-પ્રદાન કરવામાં આવ્યું હતું. આ ભાગીદારીમાં QpiAI, Space Society Of Mechanical Engineers, Universitas Jember-Indonesia, Oizom Instruments, Reliance Industries Limited, BAJAJ Engineering Skills Training Centre, NIPER-A Ahmedabad અને ONGC Green Ltd. સહિતની સંસ્થાઓનો સમાવેશ થયો હતો. આ MoUનો હેતુ વિદ્યાર્થીઓને ઉદ્યોગલક્ષી તાલીમ, સંશોધન, નવીનતા અને રોજગારની તકો સાથે વધુ મજબૂત રીતે જોડવાનો છે.

તાઇવાન સાથે ટેકનોલોજી ક્ષેત્રે સહયોગ વધારવા પર ભાર

ભારતમાં તાઇવાનના પ્રતિનિધિ ડૉ. મુ-મિન ચેને સેમિકન્ડક્ટર ક્ષેત્રે તાઇવાનની સફળતા અને ભારત સાથેના ટેકનોલોજીકલ સહયોગ અંગે માહિતી આપી હતી. તેમણે જણાવ્યું હતું કે ભારતીય વિદ્યાર્થીઓ, પ્રોફેસરો અને યુનિવર્સિટીઓ સાથે શૈક્ષણિક આદાન-પ્રદાન તથા સંયુક્ત સંશોધનને વધુ મજબૂત બનાવવાની દિશામાં તાઇવાન કામ કરી રહ્યું છે.

ક્લાઇમેટ એક્શન માટે નવું સેન્ટર

સમિટ દરમિયાન PDEU ખાતે ટૂંક સમયમાં ‘સેન્ટર ઓફ એક્સેલન્સ ઇન ક્લાઇમેટ એક્શન’ શરૂ કરવાની જાહેરાત પણ કરવામાં આવી હતી. ક્લાઇમેટ ચેન્જ, સસ્ટેનેબલ ટેકનોલોજી અને પર્યાવરણ સંબંધિત પડકારો માટે સંશોધન તથા નવીન ઉકેલો વિકસાવવાનું આ કેન્દ્ર મહત્વપૂર્ણ બની શકે છે.

ઉદ્યોગ-શિક્ષણના જોડાણથી ગુજરાતને નવી દિશા

PDEUના ડાયરેક્ટર જનરલ ડૉ. એસ. સુંદર મનોહરે જણાવ્યું હતું કે SEQUENCE 2026 સરકાર, ઉદ્યોગ અને શિક્ષણ ક્ષેત્ર વચ્ચેના સહયોગને વધુ મજબૂત બનાવવાની દિશામાં મહત્વપૂર્ણ પહેલ છે. PDEU દ્વારા સોલાર પેનલ ઉત્પાદન અને નિકાસ તેમજ Micron સાથે સેમિકન્ડક્ટર ક્ષેત્રે ATMP તાલીમ સુવિધા જેવી પહેલો દ્વારા વિદ્યાર્થીઓને ઉદ્યોગની જરૂરિયાત મુજબ તૈયાર કરવામાં આવી રહ્યા છે. સમિટમાં ઘાના, મોઝામ્બિક, યુએસ કોન્સ્યુલેટ અને બ્રિટિશ દૂતાવાસના પ્રતિનિધિઓ ઉપરાંત 50થી વધુ અગ્રણી ઉદ્યોગપતિઓ, ટેક નિષ્ણાતો અને વિદ્યાર્થીઓ ઉપસ્થિત રહ્યા હતા.