અમેરિકાની સ્વતંત્રતાની 250મી વર્ષગાંઠની ઉજવણીના ભાગરૂપે અમેરિકાએ વિશેષ સ્મારક પાસપોર્ટ લોન્ચ કર્યો છે. આ નવા પાસપોર્ટમાં અમેરિકાના ઇતિહાસ અને વારસાને દર્શાવતી વિશિષ્ટ આર્ટવર્ક સાથે આધુનિક સુરક્ષા સુવિધાઓનો પણ સમાવેશ કરવામાં આવ્યો છે. અમેરિકાના વિદેશ સચિવ માર્કો રૂબિયોએ જણાવ્યું કે આ પાસપોર્ટ માત્ર પ્રવાસ માટેનો દસ્તાવેજ નથી, પરંતુ દેશની ઓળખ, વારસા અને મૂલ્યોનું જીવંત પ્રતિક છે.

માર્કો રૂબિયોનું નિવેદન

વોશિંગ્ટનમાં યોજાયેલા લોન્ચ કાર્યક્રમ દરમિયાન માર્કો રૂબિયોએ જણાવ્યું હતું કે અમેરિકન પાસપોર્ટ દરેક નાગરિક માટે ગૌરવનું પ્રતિક છે. વિદેશ પ્રવાસ દરમિયાન આ પાસપોર્ટ અમેરિકાની ઓળખ અને વિશ્વાસનું પ્રતિનિધિત્વ કરે છે. તેમણે કહ્યું કે આ સ્મારક આવૃત્તિ અમેરિકાની સ્થાપનાના 250 વર્ષ પૂર્ણ થવાના ઐતિહાસિક અવસરને સમર્પિત છે.

6 જુલાઈથી મળશે નવો પાસપોર્ટ

આ વિશેષ પાસપોર્ટ 6 જુલાઈથી સામાન્ય નાગરિકો માટે ઉપલબ્ધ થશે. તેમાં અમેરિકાની સ્થાપના અને ઐતિહાસિક વારસાને દર્શાવતી ખાસ ડિઝાઇન આપવામાં આવી છે, જ્યારે હાલના પાસપોર્ટમાં રહેલી તમામ અદ્યતન સુરક્ષા સુવિધાઓ પણ યથાવત રાખવામાં આવી છે. દરેક સ્મારક પાસપોર્ટ સાથે ખાસ પ્રેઝન્ટેશન બોક્સ અને પ્રમાણિકતાનું સર્ટિફિકેટ પણ આપવામાં આવશે.

પાસપોર્ટ અરજી થશે સંપૂર્ણ ડિજિટલ

માર્કો રૂબિયોએ જણાવ્યું કે અમેરિકન સરકાર હવે પાસપોર્ટ સિસ્ટમને સંપૂર્ણ આધુનિક બનાવવાના પ્રયાસો કરી રહી છે. આગામી મહિનાઓમાં પાસપોર્ટ અરજી પ્રક્રિયાનો મોટાભાગનો ભાગ ઓનલાઈન કરવામાં આવશે. અરજદારો પોતાના મોબાઇલ અથવા કમ્પ્યુટરથી જ ફોટો અપલોડ કરી શકશે અને ફેશિયલ વેરિફિકેશન દ્વારા અરજી પૂર્ણ કરી શકશે. આ વ્યવસ્થાથી લાંબી લાઈનો, રાહ જોવાની જરૂરિયાત અને એપોઇન્ટમેન્ટની સમસ્યામાં નોંધપાત્ર ઘટાડો થશે.

ક્યૂઆર કોડથી જાણી શકાશે અમેરિકાનો ઇતિહાસ

ભવિષ્યમાં નવા પાસપોર્ટમાં ક્યૂઆર કોડ પણ ઉમેરવામાં આવશે. આ ક્યૂઆર કોડ સ્કેન કરતાં અમેરિકાના ઇતિહાસની મહત્વપૂર્ણ ઘટનાઓ અંગેના ટૂંકા વિડિયો જોઈ શકાશે, જેથી નાગરિકો પોતાના દેશના ગૌરવશાળી ઇતિહાસને વધુ સારી રીતે જાણી શકે.

ટ્રમ્પને અપાયો પ્રથમ સ્મારક પાસપોર્ટ

રૂબિયોએ વધુમાં જણાવ્યું કે પ્રથમ સ્મારક પાસપોર્ટ અમેરિકાના રાષ્ટ્રપતિ ડોનાલ્ડ ટ્રમ્પને અર્પણ કરવામાં આવ્યો હતો અને ટ્રમ્પે આ વિશેષ પાસપોર્ટની ખૂબ પ્રશંસા કરી હતી. અમેરિકાના સ્ટેટ ડિપાર્ટમેન્ટે જણાવ્યું કે આ સ્મારક પાસપોર્ટ દેશના ગૌરવશાળી ઇતિહાસ, લોકશાહી, સ્વતંત્રતા અને એકતાના મૂલ્યોને સમર્પિત છે, સાથે જ ભવિષ્યના 250 વર્ષ સુધી નવીનતા અને નેતૃત્વ માટેની અમેરિકાની પ્રતિબદ્ધતાનું પણ પ્રતિનિધિત્વ કરે છે.