નવી દિલ્હી: દેશમાં ડિજિટલ પેમેન્ટનો ઉપયોગ ઝડપથી વધતા UPI સિસ્ટમમાં સુરક્ષા વધુ મજબૂત બનાવવા માટે નેશનલ પેમેન્ટ્સ કોર્પોરેશન ઓફ ઇન્ડિયા (NPCI) દ્વારા એક મહત્વપૂર્ણ નિર્ણય લેવામાં આવ્યો છે. આજથી Google Pay, PhonePe અને Paytm જેવા UPI એપ્સમાં મોટા ટ્રાન્ઝેક્શન માટે ફિંગરપ્રિન્ટ અથવા Face ID જેવી બાયોમેટ્રિક વેરિફિકેશન ફરજિયાત બનાવવામાં આવી છે.

નવા નિયમો મુજબ હવે માત્ર 4 અથવા 6 અંકના UPI PIN પર આધાર રાખીને હાઈ-વેલ્યૂ ટ્રાન્ઝેક્શન કરી શકાશે નહીં. મોટા પેમેન્ટ દરમિયાન યુઝર્સને ફિંગરપ્રિન્ટ, Face ID અથવા અન્ય ડિવાઇસ આધારિત સુરક્ષા પ્રક્રિયા પૂર્ણ કરવી પડશે. આ પગલાનો મુખ્ય હેતુ સાયબર ફ્રોડ અને અનધિકૃત ટ્રાન્ઝેક્શનને અટકાવવાનો છે.

સાથે જ હવે કોઈપણ પેમેન્ટ કરતા પહેલા લાભાર્થીનું સંપૂર્ણ અને વેરિફાઇડ નામ એપમાં દર્શાવવામાં આવશે. આ નવી સુવિધા દ્વારા ખોટા UPI ID અથવા નંબર પર પૈસા ટ્રાન્સફર થવાની સમસ્યા ઘટાડવાનો પ્રયાસ કરવામાં આવ્યો છે.

NPCIના જણાવ્યા મુજબ આ સમગ્ર સિસ્ટમ તમામ બેંકો અને પેમેન્ટ એપ્સ સાથે રિયલ-ટાઇમમાં જોડવામાં આવી છે અને ઓટોમેટિક અપડેટ દ્વારા યુઝર્સના ફોનમાં લાગુ થશે.

ડિજિટલ પેમેન્ટને વધુ સુરક્ષિત અને પારદર્શક બનાવવા માટે આ પગલું મહત્વપૂર્ણ માનવામાં આવી રહ્યું છે, જે કરોડો UPI યુઝર્સને સીધી સુરક્ષા આપશે.

સાથે જ UPI આધારિત કાર્ડલેસ ATM વિથડ્રૉલના નિયમોમાં પણ ફેરફાર કરવામાં આવ્યો છે. નવા નિયમ મુજબ આવા ટ્રાન્ઝેક્શન હવે માસિક મફત ATM ઉપાડ મર્યાદામાં ગણાશે અને મર્યાદા પૂર્ણ થયા બાદ વધારાનો ચાર્જ લાગુ પડશે.