સુરત સુરતના પાલ વિસ્તારમાં આવેલા વિશાલ આર્કેડ શોપિંગ કોમ્પ્લેક્સમાં એક યુવક ચોથા માળે ફસાઈ જતાં ભારે ચકચાર મચી ગઈ હતી. ઘટનાની જાણ થતાં ફાયર વિભાગની ટીમ તાત્કાલિક ઘટનાસ્થળે પહોંચી હતી.

મળતી માહિતી મુજબ, સફાઈ કામ માટે આવેલો યુવક કોમ્પ્લેક્સની બહારની દિવાલની સાઈડમાં સફાઈ કરવા ગયો હતો. જોકે, કામ પૂર્ણ થયા બાદ તે પરત ફરી શક્યો નહોતો અને ચોથા માળે જ ફસાઈ ગયો હતો.

યુવક ફસાઈ ગયો હોવાની જાણ થતાં ફાયર ઓફિસર વાનખેડે સહિતની ટીમ તાત્કાલિક સ્થળ પર દોડી ગઈ હતી. યુવક સુધી સુરક્ષિત રીતે પહોંચવા માટે ફાયર વિભાગ દ્વારા ટર્ન ટેબલ લેડર મંગાવવામાં આવી હતી.

રેસ્ક્યુ ઓપરેશન દરમિયાન કોમ્પ્લેક્સના કાચ તોડીને ફાયર કર્મચારીઓ યુવક સુધી પહોંચ્યા હતા અને તેને સુરક્ષિત રીતે નીચે ઉતારવામાં સફળતા મેળવી હતી.

લગભગ અડધા કલાકની ભારે જહેમત બાદ ફાયર વિભાગે યુવકનું સફળતાપૂર્વક રેસ્ક્યુ કર્યું હતું. સમગ્ર ઘટનામાં યુવકને કોઈ ઈજા પહોંચી નહોતી, જેને કારણે સૌએ રાહતનો શ્વાસ લીધો હતો.