India vs England ODI Series 2026: ભારતીય ક્રિકેટ ટીમ હાલમાં ઈંગ્લેન્ડના પ્રવાસે છે, જ્યાં બંને ટીમો વચ્ચે પાંચ મેચની T20 સિરીઝ રમાઈ રહી છે. આ સિરીઝ પૂર્ણ થયા બાદ 14 જુલાઈથી ત્રણ મેચોની ODI સિરીઝ શરૂ થવાની છે. આ મહત્વપૂર્ણ શ્રેણી માટે હવે ઈંગ્લેન્ડ ક્રિકેટ બોર્ડ (ECB) દ્વારા પોતાની ટીમની સત્તાવાર જાહેરાત કરવામાં આવી છે. ઈંગ્લેન્ડની ODI ટીમની કમાન ફરી એકવાર હેરી બ્રૂકને સોંપવામાં આવી છે. ટીમમાં અનુભવી અને મેચ વિનર ખેલાડીઓ તરીકે જોશ બટલર, જો રૂટ, સેમ કરન, આદિલ રશીદ અને વિલ જેક્સ જેવા ખેલાડીઓને સ્થાન આપવામાં આવ્યું છે. ઈંગ્લેન્ડે ભારત સામે મજબૂત અને સંતુલિત સ્ક્વોડ ઉતારી છે, જેના કારણે શ્રેણી વધુ રોમાંચક બનવાની શક્યતા છે.

14 જુલાઈથી શરૂ થશે ODI શ્રેણી
ભારત અને ઈંગ્લેન્ડ વચ્ચેની ત્રણ મેચોની ODI શ્રેણી 14 જુલાઈથી શરૂ થશે. પ્રથમ મેચ 14 જુલાઈએ, બીજી મેચ 16 જુલાઈએ અને ત્રીજી તથા અંતિમ મેચ 19 જુલાઈએ રમાશે. T20 સિરીઝ બાદ બંને ટીમો વનડે ફોર્મેટમાં પોતાની તાકાત અજમાવશે.

ભારતીય ટીમ પણ તૈયાર
ભારતીય ક્રિકેટ કંટ્રોલ બોર્ડ (BCCI) દ્વારા ODI સિરીઝ માટેની ટીમ અગાઉથી જાહેર કરવામાં આવી ચૂકી છે. ટીમની કમાન શુભમન ગિલ સંભાળશે, જ્યારે રોહિત શર્મા અને વિરાટ કોહલીની વાપસીથી ભારતીય બેટિંગ વધુ મજબૂત બની છે. ઈંગ્લેન્ડના ક્રિકેટપ્રેમીઓ ખાસ કરીને રોહિત શર્મા અને વિરાટ કોહલીને મેદાનમાં જોવા આતુર છે. બંને દિગ્ગજ ખેલાડીઓની લોકપ્રિયતા ઈંગ્લેન્ડમાં પણ જબરદસ્ત છે અને તેમની બેટિંગ પર સૌની નજર રહેશે.

ઈંગ્લેન્ડની ODI ટીમ
હેરી બ્રૂક (કેપ્ટન), રેહાન અહમદ, જોફ્રા આર્ચર, ગસ એટકિન્સન, ટોમ બેન્ટન, જેકબ બેથેલ, જોશ બટલર, જેમ્સ કોલ્સ, સેમ કરન, લિયમ ડોસન, બેન ડકેટ, વિલ જેક્સ, સાકિબ મહમૂદ, આદિલ રશીદ, જો રૂટ અને જોશ ટંગ.

ભારતની ODI ટીમ
શુભમન ગિલ (કેપ્ટન), રોહિત શર્મા, વિરાટ કોહલી, શ્રેયસ અય્યર (ઉપ-કેપ્ટન), કેએલ રાહુલ, ઈશાન કિશન, વોશિંગ્ટન સુંદર, અક્ષર પટેલ, નીતિશ કુમાર રેડ્ડી, કુલદીપ યાદવ, જસપ્રિત બુમરાહ, પ્રસિદ્ધ કૃષ્ણા, હર્ષિત રાણા, અર્શદીપ સિંહ અને ગુરનૂર બરાડ.

શું રહેશે ખાસ?
આ સિરીઝમાં ભારતની અનુભવી બેટિંગ લાઇનઅપ અને ઈંગ્લેન્ડની આક્રમક ક્રિકેટ શૈલી વચ્ચે રસપ્રદ જંગ જોવા મળશે. ખાસ કરીને રોહિત શર્મા, વિરાટ કોહલી, શુભમન ગિલ અને જો રૂટ જેવા સ્ટાર ખેલાડીઓનું પ્રદર્શન સિરીઝનું ચિત્ર બદલી શકે છે.