નવી દિલ્હી  ભારતીય શેરબજારમાં સતત પાંચમા દિવસે તેજીનો ટ્રેન્ડ જોવા મળ્યો છે. ગુરુવારના ટ્રેડિંગ સેશનના અંતે સેન્સેક્સ 254.36 અંકની તેજી સાથે 77,409.98 પર બંધ થયો હતો, જ્યારે નિફ્ટી 82.30 અંક વધીને 24,168.00 પર બંધ થયો હતો.

લાર્જકેપ સાથે મિડકેપ અને સ્મોલકેપ શેરોમાં પણ સકારાત્મક માહોલ જોવા મળ્યો હતો. નિફ્ટી મિડકેપ 100 ઈન્ડેક્સ 255.90 અંક વધીને 62,379.25 પર અને સ્મોલકેપ 100 ઈન્ડેક્સ 82.40 અંકની તેજી સાથે 18,705.60 પર બંધ થયો હતો.

સેક્ટરલ પરફોર્મન્સની વાત કરીએ તો હેલ્થકેર અને રિયલ્ટી સેક્ટર સૌથી વધુ ગેઇનર રહ્યા હતા. નિફ્ટી હેલ્થકેર અને નિફ્ટી રિયલ્ટીમાં મજબૂત ખરીદી જોવા મળી હતી. જ્યારે બેંકિંગ, ફાર્મા, એનર્જી અને સર્વિસ સેક્ટરમાં પણ વધારો નોંધાયો હતો, પરંતુ IT, મેટલ અને ઓઇલ-ગેસ સેક્ટર થોડા દબાણ હેઠળ રહ્યા હતા.

સેન્સેક્સના મુખ્ય શેરોમાં ઇન્ડિગો, ટ્રેન્ટ, BEL, NTPC, SBI, HDFC બેંક, પાવર ગ્રિડ, HUL, અદાણી પોર્ટ્સ, ટાટા સ્ટીલ, એક્સિસ બેંક અને ICICI બેંક જેવા શેરોમાં તેજી જોવા મળી હતી. બીજી તરફ ઇન્ફોસિસ, ટેક મહિન્દ્રા, મારુતિ સુઝુકી, TCS અને HCL ટેક જેવા શેરોમાં ઘટાડો નોંધાયો હતો.

બજાર નિષ્ણાતોના જણાવ્યા મુજબ, વૈશ્વિક સ્તરે અમેરિકા–ઈરાન શાંતિ સમજૂતીને લઈને આશાવાદ વચ્ચે શરૂઆતમાં બજારમાં સકારાત્મક માહોલ રહ્યો હતો, પરંતુ અમેરિકન ફેડરલ રિઝર્વના કડક નિવેદનો બાદ થોડો દબાણ જોવા મળ્યો હતો. ઉર્જા કિંમતોમાં વધારો અને મોંઘવારીના દબાણને કારણે રોકાણકારો સતર્ક રહ્યા હતા.

તેમ છતાં, કાચા તેલના ભાવમાં સતત ઘટાડો અને ભારતીય બોન્ડ યીલ્ડમાં નરમાઈને કારણે આગામી સમયમાં મોંઘવારીનો દબાણ ઓછો થઈ શકે છે એવી આશા વ્યક્ત કરવામાં આવી છે.