ફિલ્મમેકર અને ફેશન સ્ટાઇલિસ્ટ રિયા અનિલ કપૂરની ટીમ સાથે જોડાયેલી એક મોટી ચોરીની ઘટના સામે આવી છે. રિયા કપૂર માટે ભાડે લેવામાં આવેલા અંદાજે 1.35 કરોડ રૂપિયાના કિંમતી હીરાજડિત ઈયરરિંગ્સ ગુમ થતાં મુંબઈના સહાર પોલીસ સ્ટેશનમાં અજાણ્યા વ્યક્તિ સામે ગુનો નોંધવામાં આવ્યો છે. પોલીસે સમગ્ર મામલે તપાસ શરૂ કરી છે.

ફરિયાદ અનુસાર, રિયા કપૂરને ન્યૂયોર્કમાં યોજાયેલા પ્રતિષ્ઠિત ફેશન ઇવેન્ટ 'મેટ ગાલા'માં આમંત્રણ મળ્યું હતું. આ કાર્યક્રમમાં ભાગ લેવા માટે રિયા કપૂર પોતાની ટીમ સાથે 27 એપ્રિલની રાત્રે મુંબઈથી અમીરાત એરલાઇન્સની ફ્લાઇટ મારફતે દુબઈ અને ત્યારબાદ ન્યૂયોર્ક માટે રવાના થઈ હતી. તેમની સાથે છેલ્લા સાત વર્ષથી કામ કરતી જાણીતી મેકઅપ આર્ટિસ્ટ સવલીન સિંહ પણ હાજર હતી.

મુંબઈની મેહતા જ્વેલર્સ અને ગોયંકા જ્વેલર્સ પાસેથી રિયા કપૂર માટે બે જોડી મોંઘા ઈયરરિંગ્સ ભાડે લેવામાં આવ્યા હતા. આ બંને જ્વેલરી બોક્સ સવલીન સિંહે પોતાના હેન્ડબેગમાં સુરક્ષિત રાખ્યા હતા. ટીમ 28 એપ્રિલે ન્યૂયોર્કના જ્હોન એફ. કેનેડી એરપોર્ટ પર પહોંચી અને ત્યારબાદ હોટેલ પિયર ન્યૂયોર્કમાં રોકાઈ હતી.

હોટેલમાં પહોંચ્યા બાદ જ્યારે સવલીન સિંહે ટીમના સભ્યને ઈયરરિંગ્સ આપવા માટે બોક્સ ખોલ્યા, ત્યારે બંને બોક્સ ખાલી હોવાનું સામે આવ્યું. મેહતા જ્વેલર્સના પન્ના સ્ટોન જડિત હીરાના ઈયરરિંગ્સ, જેની કિંમત આશરે 66 લાખ રૂપિયા હતી, તેમજ ગોયંકા જ્વેલર્સના ઝામ્બિયન સ્ટોનવાળા ઈયરરિંગ્સ, જેની કિંમત 69 લાખ રૂપિયા હતી, ગુમ હોવાનું જાણવા મળ્યું.

ભારત પરત ફર્યા બાદ સવલીન સિંહે સહાર પોલીસ સ્ટેશનમાં ફરિયાદ નોંધાવી હતી. પોલીસે ચોરીનો ગુનો દાખલ કરીને તપાસ શરૂ કરી છે. અધિકારીઓ મુંબઈ એરપોર્ટ, ફ્લાઇટ અને ન્યૂયોર્ક પહોંચ્યા બાદની સમગ્ર સમયરેખાની તપાસ કરી રહ્યા છે, જેથી ચોરી કયા તબક્કે થઈ તે અંગે સ્પષ્ટતા થઈ શકે. હાલમાં પોલીસે વિવિધ એંગલથી તપાસ આગળ ધપાવી છે.