રાજકોટ રાજકોટમાં આંતરરાષ્ટ્રીય યોગ દિવસની અનોખી ઉજવણી કરવામાં આવી હતી. શહેરના રેસકોર્સ ખાતે આવેલા લોકમાન્ય તિલક સ્નાનાગાર ગૃહમાં મહિલાઓ અને બાળકોએ એક્વા યોગા કરીને યોગ દિવસની ઉજવણી કરી હતી.

કાર્યક્રમમાં અંદાજે 50 જેટલી મહિલાઓ અને 15 જેટલા બાળકોએ ઉત્સાહભેર ભાગ લીધો હતો. પાણીમાં કરવામાં આવતા એક્વા યોગાના વિવિધ આસનો દ્વારા યોગ અને સ્વાસ્થ્યનો સંદેશ આપવામાં આવ્યો હતો.

ભાગ લેનાર મહિલાઓએ જણાવ્યું હતું કે ઋષિમુનિઓએ આપણને આપેલી યોગની પરંપરા કુદરતની અમૂલ્ય બક્ષિસ સમાન છે. એક્વા યોગા કરવાથી શરીરને અનેક પ્રકારના લાભ મળે છે તેમજ અનેક બીમારીઓમાં રાહત પણ મળે છે. મહિલાઓએ યોગ દિવસની સાથે ડાન્સ ડેની પણ ઉજવણી કરી હતી.

મહિલાઓએ વધુમાં જણાવ્યું હતું કે યોગ માત્ર એક દિવસ પૂરતો સીમિત ન રહે, પરંતુ દરેક વ્યક્તિએ પોતાના દૈનિક જીવનમાં કાયમી રીતે યોગને અપનાવવો જોઈએ.

આ પ્રસંગે રાજકોટ મહાનગરપાલિકાના કમિશનર તુષાર સુમેરાએ પણ ઉપસ્થિત રહી યોગના મહત્વ અંગે માર્ગદર્શન આપ્યું હતું. કાર્યક્રમ દરમિયાન યોગ દ્વારા સ્વસ્થ જીવનશૈલી અપનાવવાનો સંદેશ આપવામાં આવ્યો હતો.