R. Praggnanandhaa: ભારતના યુવા ગ્રાન્ડમાસ્ટર આર.પ્રજ્ઞાનંદે નોર્વે ચેસ 2026માં વધુ એક ઐતિહાસિક સિદ્ધિ પોતાના નામે કરી છે. તેમણે વિશ્વના નંબર-1 ખેલાડી મેગ્નસ કાર્લસનને ક્લાસિકલ મુકાબલામાં હરાવીને ઇતિહાસ રચ્યો છે. આ ટૂર્નામેન્ટમાં કાર્લસન સામેની તેમની બીજી ક્લાસિકલ જીત છે.

આ સિદ્ધિ સાથે પ્રજ્ઞાનંદ એક જ નોર્વે ચેસ ટૂર્નામેન્ટમાં કાર્લસનને બે વખત ક્લાસિકલ ફોર્મેટમાં હરાવનાર પ્રથમ ભારતીય ખેલાડી બન્યા છે. આ ઉપરાંત, 2026માં વિશ્વ નંબર-1 ખેલાડીને ક્લાસિકલ ચેસમાં બે વખત હરાવનાર પ્રથમ ખેલાડી તરીકે પણ તેમણે વિશેષ સ્થાન મેળવ્યું છે.

મુકાબલો પૂર્ણ થયા બાદ કાર્લસનના ચહેરા પર નિરાશા સ્પષ્ટ જોવા મળી હતી. તેમણે પ્રજ્ઞાનંદ સાથે હાથ મિલાવ્યો, માથું હલાવી પોતાની નિરાશા વ્યક્ત કરી અને થોડા સમય બાદ રમતના ક્ષેત્રમાંથી બહાર નીકળી ગયા હતા. આ હાર કાર્લસન માટે માત્ર એક મેચની હાર નહીં, પરંતુ તેમના આઠમા નોર્વે ચેસ ખિતાબના સપનાને પણ મોટો ફટકો માનવામાં આવી રહી છે.

 આ જીત સાથે 20 વર્ષીય પ્રજ્ઞાનંદ 12 અંક સાથે ત્રીજા સ્થાને પહોંચી ગયા છે અને ખિતાબની રેસમાં મજબૂત દાવેદાર તરીકે ઉભરી આવ્યા છે. બીજી તરફ કાર્લસન માટે આ ટૂર્નામેન્ટ પડકારજનક રહ્યું છે. તેમને અત્યાર સુધી ચાર ક્લાસિકલ મુકાબલામાં પરાજય મળ્યો છે, જેમાંથી બે હાર પ્રજ્ઞાનંદ સામે આવી છે.

ટૂર્નામેન્ટમાં વેસ્લી સો 14 અંક સાથે ટોચના સ્થાને છે, જ્યારે અલીરેજા ફિરુજા  સાથે 13 અંક સાથે બીજા સ્થાને છે. વર્તમાન વિશ્વ ચેમ્પિયન ડી ગુકેશને વધુ એક ક્લાસિકલ હારનો સામનો કરવો પડ્યો છે, જેના કારણે તેમની ખિતાબ જીતવાની આશા લગભગ સમાપ્ત થઈ ગઈ છે.

હવે ટૂર્નામેન્ટમાં માત્ર બે રાઉન્ડ બાકી છે. કાર્લસનને તેમના ઘરઆંગણે બે વખત હરાવી પ્રજ્ઞાનંદે સાબિત કર્યું છે કે તેઓ વિશ્વ ચેસના સર્વોચ્ચ સ્તરે કોઈપણ ખેલાડીને પડકાર આપી શકે છે. હવે સૌની નજર બાકી રહેલા નિર્ણાયક મુકાબલાઓ પર છે.