Asian Gamesમાં સુજીત કલકલનો ચમત્કારિક વિજય! 2-9થી પાછળ હતો, છેલ્લી 11 સેકન્ડમાં પલટાવી બાજી

Asian Games: એશિયન ગેમ્સ 2026માં ભારતીય પહેલવાન સુજીત કલકલે કુસ્તીમાં શાનદાર પ્રદર્શન કરીને સુવર્ણ પદક જીત્યું છે. પુરુષોની 65 કિલોગ્રામ ફ્રીસ્ટાઇલ કુસ્તીની ફાઇનલમાં સુજીતે તાજિકિસ્તાનના અબ્દુલમજીદ કુદિયેવને 10-9થી હરાવ્યો હતો. એક સમયે 2-9થી પાછળ ચાલી રહેલા સુજીતે અંતિમ ક્ષણોમાં જોરદાર વાપસી કરીને મુકાબલાનું પરિણામ બદલી નાખ્યું હતું.

https://twitter.com/dilseanilbansal/status/2105960875404464168

છેલ્લી દોઢ મિનિટમાં સુજીતની શાનદાર વાપસી

ફાઇનલ મુકાબલાની શરૂઆતમાં તાજિકિસ્તાનના પહેલવાને સુજીત પર દબાણ બનાવ્યું હતું. પ્રથમ રાઉન્ડના અંતે સુજીત 2-4થી પાછળ હતો. બીજા રાઉન્ડમાં પણ પ્રતિસ્પર્ધીએ સરસાઈ વધારીને સ્કોર 9-2 કરી દીધો હતો. આ સમયે સુજીત માટે સુવર્ણ પદક જીતવું મુશ્કેલ લાગી રહ્યું હતું, પરંતુ સુજીતે હાર ન માની. મુકાબલાના અંતિમ તબક્કામાં તેણે સતત આક્રમક દાવ લગાવીને પોઈન્ટ મેળવવાનું શરૂ કર્યું. એક પછી એક સફળ ટેકડાઉનથી તેણે સ્કોરનો તફાવત ઘટાડીને મુકાબલાને રોમાંચક બનાવી દીધો.

અંતિમ 11 સેકન્ડમાં નિર્ણાયક દાવ

મુકાબલો પૂરો થવામાં માત્ર 11 સેકન્ડ બાકી હતાં ત્યારે સુજીતે નિર્ણાયક દાવ લગાવ્યો. આ દાવથી તેને બે પોઈન્ટ મળ્યા અને સ્કોર 10-9 થઈ ગયો. આમ, 2-9થી પાછળ રહ્યા બાદ સુજીતે એક પોઈન્ટના અંતરથી ફાઇનલ જીતીને ભારત માટે સુવર્ણ પદક પોતાના નામે કર્યું.

હરિયાણાના સુજીત કલકલની આંતરરાષ્ટ્રીય સફળતા

સુજીત કલકલ હરિયાણાના ચરખી દાદરી વિસ્તારના છે. તેમના પિતા દયાનંદ કલકલ પણ રાષ્ટ્રીય સ્તરના પહેલવાન રહી ચૂક્યા છે. સુજીતે અગાઉ અંડર-20 અને અંડર-23 સ્તરે એશિયન ચેમ્પિયનશિપમાં સફળતા મેળવી હતી. વર્ષ 2025માં તેમણે સર્બિયાના નોવી સદ ખાતે યોજાયેલી અંડર-23 વર્લ્ડ ચેમ્પિયનશિપમાં પણ સુવર્ણ પદક જીત્યું હતું. એશિયન ગેમ્સની આ જીત સુજીતની કારકિર્દીની મહત્વપૂર્ણ સિદ્ધિ છે. અંતિમ ક્ષણ સુધી સંઘર્ષ કરીને તેમણે ભારતને કુસ્તીમાં સુવર્ણ પદક અપાવ્યું છે.