Mohammed Sirajને મળી આ ટીમની કેપ્ટનશીપ, 2 મેચમાં સંભાળશે ટીમની કમાન

Mohammed Siraj: ટીમ ઈન્ડિયાના સ્ટાર ફાસ્ટ બોલર મોહમ્મદ સિરાજને રણજી ટ્રોફી 2026-27 માટે હૈદરાબાદ ટીમનો કેપ્ટન બનાવવામાં આવ્યો છે. મોહમ્મદ સિરાજ હૈદરાબાદની પ્રથમ 2 મેચમાં ટીમનું નેતૃત્વ કરતો જોવા મળશે. હૈદરાબાદ ક્રિકેટ એસોસિએશને રવિવારે આગામી રણજી ટ્રોફીની પ્રથમ 2 મેચ માટે તેની 15 સભ્યોની ટીમની જાહેરાત કરી.

મોહમ્મદ સિરાજને આ ટીમનું કેપ્ટનશિપ સોંપવામાં આવી છે, જ્યારે સીવી મિલિંદને વાઈસ-કેપ્ટન બનાવવામાં આવ્યો છે. એસોસિએશને તેની પ્રેસ રિલીઝમાં કહ્યું છે કે મોહમ્મદ સિરાજની ગેરહાજરી અથવા અનુપલબ્ધતાની સ્થિતિમાં મિલિંદ ટીમની કેપ્ટનશિપની જવાબદારી સંભાળશે.

મોહમ્મદ સિરાજ રણજી ટ્રોફીની પહેલી 2 મેચમાં ટીમનું નેતૃત્વ કરશે

મોહમ્મદ સિરાજ વેસ્ટ ઈન્ડીઝ સામે 27 સપ્ટેમ્બરથી શરૂ થનારી 3 મેચની ODI સિરીઝ માટે ભારતીય ટીમનો ભાગ છે. આ સિરીઝ 3 ઓક્ટોબરના રોજ સમાપ્ત થશે. ત્યારબાદ મોહમ્મદ સિરાજ 2026-27 રણજી ટ્રોફીની પ્રથમ 2 મેચમાં હૈદરાબાદનું નેતૃત્વ કરશે. હૈદરાબાદ 11 ઓક્ટોબરના રોજ ત્રિપુરા સામે રણજી ટ્રોફી અભિયાનની શરૂઆત કરશે. પરંતુ આ મેચ માટેનું સ્થળ હજુ સુધી જાહેર કરવામાં આવ્યું નથી. ટીમની બીજી મેચ 18 ઓક્ટોબરના રોજ વિજયનગરમમાં આંધ્ર સામે રમાશે.

આ સિવાય હૈદરાબાદની ટીમમાં ઘણા અનુભવી ખેલાડીઓનો સમાવેશ થાય છે. અનુભવી બેટ્સમેન તન્મય અગ્રવાલ અને રાહુલ સિંહ, વિકેટકીપર-બેટ્સમેન રાહુલ રાદેશ અને સાઈ રેડ્ડી પણ ટીમનો ભાગ છે. તનય ત્યાગરાજન, અનિકેત રેડ્ડી અને અજય દેવ ગૌડનો પણ ટીમમાં સમાવેશ કરવામાં આવ્યો છે. વધુમાં હૈદરાબાદ દ્વારા 7 સ્ટેન્ડબાય ખેલાડીઓની પણ પસંદગી કરવામાં આવી છે.

મોહમ્મદ સિરાજને તેની લય શોધવામાં મુશ્કેલી પડી

મોહમ્મદ સિરાજે તાજેતરમાં ખુલાસો કર્યો હતો કે લગભગ 2 મહિનાના વિરામ પછી શ્રીલંકા પ્રવાસ દરમિયાન તેને પોતાની ગતિ અને લય મેળવવામાં સંઘર્ષ કરવો પડ્યો હતો. પરંતુ દુલીપ ટ્રોફીમાં લાંબા સ્પેલ્સ બોલિંગ કરવાથી તેને તેની લય પાછી મેળવવામાં મદદ મળી.

શ્રીલંકા સામેની 2 ટેસ્ટ સિરીઝ દરમિયાન મોહમ્મદ સિરાજ તેની સામાન્ય લયમાં ન હતો. તેની ગતિ પણ પહેલા કરતા ઓછી થઈ ગઈ હતી, અને તે પોતાની લય શોધવામાં સંઘર્ષ કરી રહ્યો હતો. આ સિરીઝની 4 ઈનિંગમાં, તેને કુલ 44 ઓવર બોલિંગ કરી અને 4 વિકેટ લીધી.

રણજી ટ્રોફી 2026-27 માટે હૈદરાબાદ ટીમ

મોહમ્મદ સિરાજ (કેપ્ટન), સીવી મિલિંદ (વાઈસ-કેપ્ટન), તન્મય અગ્રવાલ, એમ અભિરથ રેડ્ડી, રાહુલ સિંહ, કે હિમા તેજા, રાહુલ રાદેશ (વિકેટકીપર), સાઈ રેડ્ડી (વિકેટકીપર), વરુણ ગૌડ, તનય ત્યાગરાજન, અનિકેત રેડ્ડી, રક્ષન રેડ્ડી, અજય દેવ ગૌડ઼, રૂતિક યાદવ મેંડે, સાઈ વિકાસ રેડ્ડી

સ્ટેન્ડબાય ખેલાડીઓ: ભાવેશ સેઠ (વિકેટકીપર), એચકે સિમ્હા, ટી રવિ તેજા, શૌનક કુલકર્ણી, મુદસ્સર હુસૈન, કાર્તિકેય કાક અને એ પૃથ્વી રેડ્ડી.

આ પણ વાંચો: Smriti Mandhanaએ રચ્યો ઈતિહાસ, વિમેન્સ T20Iમાં સૌથી વધુ રન બનાવનાર ખેલાડી બની