Junior Women Hockey Team એ સતત ત્રીજીવાર એશિયા કપ જીત્યો, પીએમ મોદીએ પાઠવ્યા અભિનંદન

Junior Women Hockey Team : ચીનમાં રમાયેલા રોમાંચક ફાઇનલ મુકાબલામાં ભારતે યજમાન ચીનની ટીમને 1-0થી હરાવીને સતત ત્રીજી વખત એશિયા કપનો ખિતાબ પોતાના નામે કર્યો છે. આ શાનદાર જીત સાથે ભારતીય ટીમે જુનિયર મહિલા હોકી વર્લ્ડ કપ માટે પણ ક્વોલિફાય કરી લીધું છે.

ફાઇનલ મુકાબલામાં બંને ટીમો વચ્ચે શરૂઆતથી જ કાંટેની ટક્કર જોવા મળી હતી. યજમાન ચીનની ટીમે શરૂઆતમાં બોલ પર વધુ કબજો જમાવ્યો હતો અને ભારતીય ટીમ પર દબાણ બનાવવાનો પ્રયાસ કર્યો હતો. ચીનના ખેલાડીઓએ ભારતીય ડિફેન્સને સતત પડકાર આપ્યો હતો.

એશિયા કપમાં ભારતની હેટ્રિક

ભારતીય ખેલાડીઓએ શાનદાર સંયમ અને મજબૂત રક્ષણાત્મક રમતનું પ્રદર્શન કર્યું હતું. ભારતીય ડિફેન્સે ચીનના હુમલાઓને નિષ્ફળ બનાવતા યજમાન ટીમને ગોલ કરવાની મોટી તક મળી નહોતી. મેચની 17મી મિનિટ ભારતીય ટીમ માટે નિર્ણાયક સાબિત થઈ હતી. ટીમ ઈન્ડિયાની સ્ટાર ખેલાડી સાનિકા ચંદ્રકાંત માનેએ શાનદાર ગોલ કરીને ભારતને 1-0ની મહત્વપૂર્ણ સરસાઈ અપાવી હતી.

સાનિકાના આ ગોલ બાદ ભારતીય ટીમનો આત્મવિશ્વાસ વધુ મજબૂત બન્યો હતો. બીજી તરફ ચીનની ટીમે બરાબરી કરવા માટે સતત પ્રયાસો કર્યા હતા. યજમાન ટીમે આક્રમક રમત રમવાનો પ્રયાસ કર્યો, પરંતુ ભારતીય ખેલાડીઓએ પોતાની રક્ષણાત્મક લાઇનને મજબૂત રાખી હતી. ભારતે ચીનને ગોલ કરવાની તક ન આપતા અંત સુધી પોતાની 1-0ની લીડ જાળવી રાખી હતી.

હવે વર્લ્ડ કપ માટે પણ ટીમ ઈન્ડિયા ક્વોલિફાય

અંતિમ સીટી વાગતા જ ભારતીય ખેલાડીઓ અને સપોર્ટ સ્ટાફમાં ખુશીની લહેર છવાઈ ગઈ હતી. ભારતે સતત ત્રીજી વખત જુનિયર મહિલા એશિયા કપનું ટાઇટલ જીતીને ઐતિહાસિક સિદ્ધિ નોંધાવી છે. આ જીત ભારતીય હોકી માટે પણ મહત્વપૂર્ણ છે, કારણ કે એશિયા કપ ચેમ્પિયન બનવાની સાથે ટીમે જુનિયર મહિલા હોકી વર્લ્ડ કપમાં સ્થાન નિશ્ચિત કર્યું છે. સાનિકા માનેનો નિર્ણાયક ગોલ અને ભારતીય ડિફેન્સનું શાનદાર પ્રદર્શન ટીમની જીતના મુખ્ય આધાર રહ્યા હતા.

ચીનની ધરતી પર યજમાન ટીમને હરાવી ભારતીય દીકરીઓએ દેશનું ગૌરવ વધાર્યું છે. એશિયા કપમાં ત્રીજી સતત જીત સાથે ભારતીય જુનિયર મહિલા હોકી ટીમે સાબિત કરી દીધું છે કે ભારતીય હોકીનું ભવિષ્ય ઉજ્જવળ છે. હવે ટીમની નજર આગામી જુનિયર મહિલા હોકી વર્લ્ડ કપમાં પણ શાનદાર પ્રદર્શન કરીને દેશ માટે વધુ એક મોટી સિદ્ધિ હાંસલ કરવા પર રહેશે.

આ પણ વાંચો : Ganesh Chaturthi 2026 : ગણેશ કૃપા મેળવવાની સંપૂર્ણ પૂજા વિધિ જાણો, શુભ મુહૂર્ત, મંત્ર, પ્રસાદ અને ખાસ નિયમો