Harmanpreet Kaur ત્રણેય ફોર્મેટની કેપ્ટનશિપ છોડી, કહ્યું- ‘હવે ફરી રમતના પ્રેમ માટે રમવા તૈયાર છું’
Harmanpreet Kaur
Harmanpreet Kaur ત્રણેય ફોર્મેટની કેપ્ટનશિપ છોડી, કહ્યું- ‘હવે ફરી રમતના પ્રેમ માટે રમવા તૈયાર છું’
Harmanpreet Kaur
Harmanpreet Kaur : ભારતીય મહિલા ક્રિકેટ ટીમની લાંબા સમયથી કેપ્ટન રહેલી હરમનપ્રીત કૌરે મોટો નિર્ણય લીધો છે. 6 ઓક્ટોબર 2026ના રોજ હરમનપ્રીત કૌરે ભારતીય મહિલા ટીમની ત્રણેય ફોર્મેટ એટલે કે ટેસ્ટ, વનડે અને T20ની કેપ્ટનશિપ છોડવાની જાહેરાત કરી છે. તેમણે સોશિયલ મીડિયા પર ભાવુક પોસ્ટ કરીને પોતાના નિર્ણયની જાણકારી આપી હતી.
હરમનપ્રીત કૌરે શું કહ્યું?
કેપ્ટનશિપ છોડવાની જાહેરાત કરતાં હરમનપ્રીતે જણાવ્યું કે આ તેમના માટે સરળ નિર્ણય નહોતો. તેમણે કહ્યું કે કેપ્ટન તરીકેના વર્ષોમાં અનેક યાદો, લાગણીઓ અને બલિદાનો જોડાયેલા છે. ટીમને પ્રાથમિકતા આપવા માટે ઘણી વખત તેમણે પોતાની વ્યક્તિગત મહત્વાકાંક્ષાઓ અને રમતને પાછળ રાખવી પડી હતી.
હરમનપ્રીતે કહ્યું કે તેમણે ટીમને પોતાનું બધું જ આપ્યું છે અને હવે તેમને લાગે છે કે તેમણે પોતાની ફરજ નિભાવી છે. તેમણે કેપ્ટનશિપ છોડ્યા બાદ ફરી માત્ર ક્રિકેટના પ્રેમ માટે રમવા માટે તૈયાર હોવાની વાત કહી છે.
BCCI રિવ્યૂ મીટિંગ બાદ નિર્ણય
રિપોર્ટ્સ અનુસાર, હરમનપ્રીતનો આ નિર્ણય BCCIની રિવ્યૂ મીટિંગ બાદ સામે આવ્યો છે. ગુવાહાટીમાં યોજાયેલી આ બેઠકમાં ભારતીય મહિલા ટીમની તાજેતરની સફર અંગે ચર્ચા થઈ હતી. બેઠકમાં હરમનપ્રીત ઉપરાંત વાઇસ-કેપ્ટન સ્મૃતિ મંધાના અને મુખ્ય કોચ અમોલ મુઝુમદાર પણ હાજર હતા.
હરમનપ્રીતના નેતૃત્વમાં ભારતે રચ્યો ઇતિહાસ
હરમનપ્રીત કૌરના નેતૃત્વમાં ભારતીય મહિલા ટીમે મહત્વની સિદ્ધિઓ હાંસલ કરી છે. તેમના નેતૃત્વમાં ભારતે 2025માં પ્રથમ વખત મહિલા વનડે વર્લ્ડ કપ જીત્યો હતો. તાજેતરમાં 2026 એશિયન ગેમ્સમાં પણ ભારતીય ટીમે T20 ફોર્મેટમાં ગોલ્ડ મેડલ જીત્યો હતો.
હવે ખેલાડી તરીકે ટીમ સાથે રહેશે
કેપ્ટનશિપ છોડ્યા બાદ હરમનપ્રીત ભારતીય ટીમ સાથે ખેલાડી તરીકે જોડાયેલી રહેશે. તેમણે પોતાના નિવેદનમાં સ્પષ્ટ કર્યું છે કે કેપ્ટનશિપનો અંત તેમની ક્રિકેટ સફરનો અંત નથી. તેમણે ટીમના ભવિષ્ય અંગે વિશ્વાસ વ્યક્ત કરતાં કહ્યું કે ટીમ સારી સ્થિતિમાં છે અને તેમાં પ્રતિભા, આત્મવિશ્વાસ તથા ભવિષ્ય માટેની ક્ષમતા છે.
હવે સૌથી મોટો સવાલ એ છે કે હરમનપ્રીત બાદ ભારતીય મહિલા ટીમની ત્રણેય ફોર્મેટમાં કેપ્ટનશિપની જવાબદારી કોને સોંપવામાં આવશે. આ અંગેનો અંતિમ નિર્ણય BCCI તરફથી આવવાનો બાકી છે.
